Melania Knauss u bë Melania Trump më 22 janar 2005 dhe lindi djalin e saj të parë dhe të vetëm, Barron, një vit më vonë. Në të njëjtin vit, ajo u bë edhe shtetase amerikane. Jeta e Melania Trumpit mori një kthesë tjetër kur burri i saj kandidoi për president i Shteteve të Bashkuara në vitin 2016
Prindërit e quajtën Melania Knavs. Bota tani e njeh atë si ish-zonjën e parë të Shteteve të Bashkuara, Melania Trump. Ajo u lind më 26 prill 1970 në Novo Mesto të Sllovenisë. Gjatë fëmijërisë së saj në qytetin e Sevnicës, babai i saj shiste makina, ndërsa nëna e saj punonte në industrinë e tekstilit. Melania Knavs ishte megjithatë e interesuar për modën, kujton ish-shoqja e saj e shkollës, Mirjana Jelançiç.
“Asaj i pëlqente gjithashtu të krijonte veshje të reja nga ato të vjetra”, ka thënë Jelançiç. Ajo ndërpreu studimet universitare dhe me emrin e ri Melania Knauss, ndoqi karrierën e modeles në Evropë. Në vitet 1990, suksesi e çoi në Shtetet e Bashkuara. “Si një modele dhe dikush që ftohej shpesh në festat luksoze në New York, me sa kuptoj kështu u takua me Donald Trumpin”, ka thënë profesoresha e historisë Katherine Jellison nga Universiteti i Ohios. Melania Knauss u bë Melania Trump më 22 janar 2005 dhe lindi djalin e saj të parë dhe të vetëm, Barron, një vit më vonë. Në të njëjtin vit, ajo u bë edhe shtetase amerikane. Jeta e Melania Trumpit mori një kthesë tjetër kur burri i saj kandidoi për president i Shteteve të Bashkuara në vitin 2016 me Partinë Republikane dhe ajo iu bashkua atij në fushatën elektorale.
“Është e mrekullueshme të jem këtu sot me ju dhe me bashkëshortin tim. Jam shumë krenare për të”, pati thënë ajo në atë kohë. Donald Trumpi bëri betimin si presidenti i 45-të i Shteteve të Bashkuara në janar të vitit 2017.
Si zonja e parë, Melania Trump bëri udhëtime në mbarë botën dhe ndërmori projekte si fushata “Bëhu më i miri” që fokusohet në mirëqenien e fëmijëve, sigurinë në internet dhe abuzimin me opioidet. Ajo mbajti një profil më të ulët se shumë zonja të para, por u përball megjithatë me një vëmendje intensive nga mediat, sipas Jellisonit. “U kritikua nga disa qarqe për zgjedhjet e saj të modës, për vendimin e saj për të mos u zhvendosur menjëherë në Shtëpinë e Bardhë, për fushatën e saj ‘Bëhu më i miri’, që nuk ishte një nga projektet më të suksesshme të shërbimit publik nga një zonjë e parë”, ka thënë ajo. Pas largimit nga Shtëpia e Bardhë, Melania Trump praktikisht u largua nga sytë e publikut. Ajo është rishfaqur herë pas here për të mbështetur kandidaturën e bashkëshortit të saj për rizgjedhje. Dhe për të reklamuar librin e saj me kujtime.
“Shkrimi i këtyre kujtimeve ka qenë një udhëtim thellësisht personal dhe reflektues për mua”, ka thënë Melania Trump.
Votuesi nga shteti Wisconsin, Austin Smith votoi për kandidatin republikan Donald Trump në vitin 2016. Ai shprehu shpresat e tij për rikthimin e mundshëm të Melania Trump-it në Shtëpinë e Bardhë. “Do të doja që ajo të merrej ndoshta me disa projekte për kafshët shtëpiake. Një gjë për të cilën jam shumë i apasionuar është për shembull çështja e ushqimit në shkolla”, ka thënë Smith. Votuesja demokrate Jasleen Kaur do të donte që Melania Trump të ishte një “zonjë e parë me ndikim”. “Dalja dhe bisedimi me komunitetet urbane, dalja në të gjithë vendin duke e bërë veten të njohur, jo vetëm si një figurë që qëndron pas presidentit, por si një grua me një lloj pushteti”, ka thënë Kaur.
Analistja Jellison, megjithatë, mendon se si një zonjë e parë në mandatin e dytë, Melania Trump ndoshta do të vazhdonte, në pjesën më të madhe, t’i shmangej vëmendjes.
