Pas Aleancës për Shqiptarët, edhe Bashkimi Demokratik për Integrim ka shprehur shqetësimin me, siç thuhet në reagim, “mendësinë e partizimit të institucioneve të pavarura nga ana e partnerëve koalicionues në qeverinë pa legjitimitet etnik”.
Në reagimin drejtuar mediave, BDI thotë se kandidatët për anëtarë në Këshillin e Agjencisë për Media, Nafije Selmani dhe Afrona Verzivolli, gënjyen deputetët, qytetarët dhe mediat gjatë debatit të djeshëm në komisionin parlamentar për zgjedhje dhe emërime.
“Nafije Selmani dhe Afrina Verzivoli janë anëtarë të partive politike në koalicionin Vlen, kanë qenë kandidat për deputetë, këshilltar komunal, kanë marrë pjesë në mbledhje të organeve partiake dhe kanë qenë të propozuar në pozita nga po ato parti. Është e turpshme, e pa skrupulltë, të gënjehet i gjithë opinioni pa ju dridhur qerpiku. Me çfarë kredibiliteti do të ushtroni detyrat e juaja kur gënjeni botërisht dhe thyeni ligjin gjatë zgjedhjes tuaj? Partizimi i këshillit të prokurorëve nga VREDI vijon të zbatohet edhe në Agjencinë për Media”, thuhet në reagimin e BDI-së.
Deputetët, vijon reagimi i BDI-së, janë para sprovës, a do të partizojnë trupat rregullator dhe të pavarur shtetëror a po do të mbrojnë kredibilitetin e institucioneve dhe kuvendit duke e zbatuar ligjin.
