Demokratët arritën të bindnin 25 parti të tjera për të formuar një koalicion me bazë të gjerë për zgjedhjet parlamentare të 11 majit. Negociatat e zhvilluara deri në limitet e skadimit të afatit ligjor krijuan një formacion ku në brendësi të tij ka të majtë e të djathtë, konservatorë e liberalë, minoritarë grekë e çamë, nën emrin “Shqipëria Madhështore”. Qëllimi është maksimalizimi i votës për parlamentaret e 11 majit.
Në të tilla tratativa, ideologjitë dalin në plan të dytë dhe çdo ecje në selinë e PD-së ishte me një synim të qartë, marrjen sa më shumë emrave në listën e sigurt. Kësisoj, më e fituara duket se doli Partia e Lirisë, e cila do të ketë në listë të sigurt katër emra: Ilir Metën, Tedi Blushin, Erisa Xhixhon dhe Edmond Haxhinaston, shkruan A2 CNN.
Pa gjë nuk dolën as aleatët e tjerë, ndonëse pretendimet e tyre mund të ishin edhe më të mëdha. Kësisoj, Fatmir Mediu, Agron Duka, Vangjel Dule dhe Shpëtim Idrizi çimentuan nga një vend në listë të sigurt, duke e çuar në 8 numrin e mandateve që demokratët do t’u japin aleatëve, me shpresën se bashkimi me votat e tyre do të arrijë të prodhojë mandate të tjera përtej listës së mbyllur.
Koalicioni në total ka 26 parti, ku në gjirin e PD-së u rikthyen edhe ata që dikur ishin cilësuar si parlamenti i mandateve të djegura. Kësisoj, emrin në këtë formacion politik e ka edhe Kujtim Gjuzi apo Selami Jenisheri, por edhe ballistët e ndarë në dy parti, si Adriatik Alimadhi dhe Artur Roshi, së bashku me Legalistët të kryesuar nga Shpëtim Axhami.
Mbyllja e kësaj marrëveshje është një problem më pak për demokratët, por dhimja e kokës për hallet e brendshme nuk ka përfunduar. Deri në datën 12 mars, kryesia e PD-së së bashku me Berishën si kryetar, duhet të hartojnë listën e kandidatëve për deputetët, ku orekset e atyre që dolën fitues në primare nuk janë të vogla. Krahas “Shqipërisë Madhështore” të Sali Berishës, pranë Komisionit Qendror të Zgjedhjeve janë regjistruar edhe dy koalicionet e tjera: “Dajthash për Zhvillim” me Dashamir Shehin dhe Enkelejd Alibeajn; si dhe formacioni tjetër, “Nisma Shqipëria Bëhet” me Adriatik Lapajn dhe Nismën Thurje. (A2 Televizion)
