Hiqet Balanseri dhe në Entin e Statistikës, nga 14 administratorë, nuk pranohet asnjë shqiptar, zgjidhet në krye të një institucioni një antishqiptar i përbetuar, e qeveria nuk paska gisht, votohet kundër mëvetësisë së palestinezëve në OKB, s’dihet kush ka votuar në emër të Maqedonisë…
Nga Daut DAUTI
- Tha Mickovski, nuk vijnë shqiptarët te ai, edhe pse ai dashka t’i punësojë, por nuk dojkan të punojnë për 22.000 denarë! Së pari, nuk e dimë nëse dikush në administrate që ka kryer fakultet starton më me 22 mijë, kjo duhet të jetë ndonjë rreng i kryeministrit, ama pusto “mediat opozitare” kishin hulumtuar dhe nuk kishin gjetur në rrethinën e tij kabinetike të ketë ndonjë që merr aq, por gjithë ishin 50-60 mijë e fju-fju! Fatura e heqjes së balanserit, ndërkohë që ende nuk dimë se kur do të sillet ai ligji i paralajmëruar nga VLEN-i që do ta zëvendësojë atë, e as se si do të funksionojë në praktikë, ja po vjen me kamatë. Sepse, ndërkohë, shumë më mirë dhe më bukur po funksionon premtimi i Mickovskit se gjer sa të jetë ai nuk do të ketë punësime etnike….
Që të na i bëjnë gjërat më të qarta, dikujt ndoshta më të mjegulluara seç janë, kujdestaron opozita e Frontit Evropian, e cila këtë javë na e bëri të ditur se në Entin Shtetëror të Statistikës, janë pranuar 14 administratorë të rinj, prej të cilëve asnjë shqiptar!
Kur e kishte lexuar në rrjetet sociale një fqinj imi, i cili shpesh mundohet të blejë ndonjë mendim nga unë saherë që më takon, ishte kapur për koke. Edhe kjo ndodhi a? I gjori, është gjithnjë e më i dëshpëruar nga jo që më shpreh, edhe pse thotë se kishte votuar pikërisht “për ndryshime”. I ishte boktisë BDI-ja për 20 vitet në pushtet, se thoshte, edhe uji më i pastër nëse rri në një vend, bëhet moçal. Por, duket se këta “të vetët” shumë më shpejtë po i dalin hujit me këto bëmat e Qeverisë, prej të cilave përherë dalin si të befasuar.
Vërtet, gjithnjë e më shumë po bëhet problem mënyra se si i koncepton partneri i koalicionit politikën shtetërore, i cili kadadalë-kadalë po ua lëshon ujin nën këmbë, gjersa ata merren se si do të marrin pjesë në zgjedhjet e ardhshme lokale(me se do të shkojnë vallë në to me gjithë këto obstruksione brenda koalicionit!?), ose se çfarë ka bërë në të kaluarën BDI-ja.
Kthjelluni, hapni sytë.
Nuk e thotë vetëm opozita “dashakeqe” se keni probleme në oborr, por edhe analistë maqedonas, si Pero Arsovski, që mendon se rënia në temat etnike, do të thotë humbje për VLEN-in. E VMRO-ja pikërisht aty po arrin të godasë.
Ka një anegdotë që e tregojnë se si disa shokë kishin shkuar dikur në një aheng për të bërë “kërdinë” sa të fiken dritat, por njëri ishte gjetur në befasi dhe kur ishin fikur dritat i thotë shokut: Ore, kur do të vijnë ato, se unë veç më i hëngra dy shkopinj prapa!
(Versionin më të saktë të anegdotës mund t’ua tregojnë ata që e dinë më mirë…)
- E mira vjen fije-fije, e keqja, lëmshe – lëmshe, thotë një fjalë e urtë. Ne jemi të prirë t’i shikojmë gjërat e mira në shoqëri, duke u nisur nga vetvetja, e ne si shqiptarë, nuk shohim shenja inkurajuese. E për ato tjerat, sikur vijnë me shumicë. Ja, çka të thuash e mendosh për qëndrimin e Maqedonisë në Këshillin për të Drejtat e Njeriut në OKB, ku janë votuar dy rezoluta për Palestinën, e që të dyjat Maqedonia është gjetur në pakicë, me Çekinë dhe Etiopinë, duke votuar kundër mëvetësisë së Palestinës, në kohën e gjenocidit të paparë Gazë. Siç është e njohur, Maqedonia deri tash përherë ka qenë pro mëvetësisë së popullit palestinez dhe kjo kthesë e papritur në qëndrime, le shumë dilema, të cilat çojnë nga mosgjeturia ose konfuzioni në politikën e jashtme, gjer te ndikimet e ngjarjeve ndërkombëtare, ku poashtu nuk ka logjikë edhe sikur të ketë ndonjë taktizim se nga do të fryjë era.
Ajo që e bën edhe më të çuditshëm, e që si kuriozitet u dha bashkë me lajmin, është se ka dilema se kush ka votuar në emër të vendit tonë, pasi shefja e misionit aktual të OKB-së në Maqedoni, Teuta Agai Demjaha, siç shkroi një portal, është tërhequr si ambasadore nga presidentja e Maqedonisë së Veriut, Gordana Siljanovska Davkovka.
Edhe më enigmatik, në dukje, por jo dhe në thelb, është emërimi i Petar Boegoevskit në krye të Agjencisë Nacionale për Programe Evropiane dhe Mobilitet të Maqedonisë së Veriut. Ai njihet për paraqitjet antishqiptare (mohon historinë, origjinën, emancipimin, virtytet e popullit shqiptar…) dhe me një gjuhë shumë fyese gjer në vulgaritet, ka zhvlerësuar gjithçka shqiptare… (Vulgriteti i skajshëm i tij nuk na lejon t’ia citojmë në këtë tekst, por ndjekësit e rrjeteve sociale kanë pasur mundësi të lexojnë diçka nga “arsenali” i tij fyes).
Çështja është interesante, njësoj si ajo e votimit në OKB kundër rezolutës për Palestinezët, sepse edhe këtu, qeveria ngre duart nga përgjegjësia për zgjedhjen e Bogoevskit, duke ia adresuar këtë Bordit të Agjencisë, edhe pse mediat citojnë një nen të ligjit, ku adresa e vërtetë është pikërisht qeveria. Nuk e dimë nëse presionet opozitare mund të bëjnë gjë për ta tërhequr zgjedhjen, e sidomos a do ta tërheqë Mickovski për hatër të VLEN-it. Këta të fundit, edhe pse u përpoqën që t’ia adresojnë BDI-së që e ka toleruar Bogoevskin kur ka qenë në pushtet koalicioni VMRO-BDI(para vitit 2017), u gjetën vërtet të papërgatitur. Harruan se paraqitjet antishqiptare datojnë pasi ky doli nga VMRO-ja gjoja si reformist, pra, 4-5 vitet e fundit, në një farë mënyre dhe se pikërisht për shkak të tyre, në gusht të vitit të kaluar këtë person pikërisht VLEN-i e kishte paditur në gjyq për përhapje të urrejtjes ndëretnike.
- Përskaj gjithë kaosit të marrëdhënieve brenda koalicionit qeveritar (Taravari me një këmbë jashtë, 3 partitë tjera të VLEN-it para shkrirjes në një parti, e as midis partnerëve maqedonas nuk ka shumë idilë), habisin deklaratat e të gjithëve se marrëdhëniet me Mickovskin I kanë të mire… E po mirë, shumë mirë…
(Autori është kolumnist i gazetës KOHA)
