Barry Bennell, trajneri pedofil, i cili u dënua me 34 vite burg më 2018 për abuzimin me 50 fëmijët që stërviti midis viteve 1979 dhe 1991, ka vdekur në burg në moshën 69-vjeçare.
“I burgosuri Barry Bennell vdiq në HMP Littlehey, Cambridgeshire, më 16 shtator 2023. Si për të gjitha vdekjet në paraburgim, Ombudsmani i Burgjeve dhe i Provës do të hetojë”, – tha një zëdhënës i burgut për vdekjen e të burgosurit.
Pedofili serial, i cili vuante nga kanceri, u burgos për herë të parë në Florida (SHBA) më 1994 për përdhunimin e një djali britanik gjatë një turneu futbolli.
Barry Bennell, për të cilin policia beson se mund të ketë abuzuar me më shumë se 100 fëmijë gjatë karrierës së tij si trajner i të rinjve, që u përkufizua si “abuzues i fëmijëve në shkallë industriale”, u dënua me burgime të ndryshme në Britaninë e Madhe më 1998, 2015, 2018 dhe 2020.
Paul Stewart, ish-lojtar i Liverpool-it, Manchester City dhe Tottenham, i cili luajti edhe me kombëtaren e Anglisë, ishte një nga viktimat e Barry Bennell, që dëshmoi kundër trajnerit pedofil në gjyq. Chris Unsworth, Jason Dunford, Steve Walters, Andy Woodward dhe David White ishin futbollistët e tjerë që denoncuan Bennell.
Gjyqtari Clement Goldstone, i cili dha dënimin e fundit kundër Barry Bennell në vitin 2020, iu drejtua drejtpërdrejt të dënuarit: “Ti je djalli i mishëruar. Ju vodhët fëmijërinë dhe pafajësinë e tyre për të kënaqur perversitetin personal”.
Gjatë gjithë karrierës së tij, Barry Bennell punoi për klube si Manchester City, Stoke City dhe Leeds United, ku iu përkushtua stërvitjes dhe rekrutimit të moshave.
