Milani nuk ndalet, kërkon Andrea Kontin

Skuadra e Milanit pasi ka blinduar krahun e majtë të mbrojtjes me zviceranin Rikardo Rodriguez, tani ka piketuar yllin e Atalantas, Andrea Kontin për krahun e djathtë. Drejtuesit e kuqezinjve do të takohen me agjentin e Kontit në ditët në vijim, në përpjekje për të afruar lojtarin e katërt në merkato. I ndjekur edhe nga Liverpuli dhe Çellsi, Konti konsiderohet si një nga lojtarët më premtues të krahut të djathtë të Italisë. Ai mund të luajë si një lojtar krahu dhe një mbrojtës i plotë, këtë sezon 23-vjeçari ka shkëlqyer te Atalanta nën drejtimin e Gasperinit duke shënuar 8 gola në 33 ndeshje, gjithashtu ai ka kontribuar edhe me 5 asiste. Me Interin, Napolin dhe madje edhe Juventusin e interesuar, Milani duhet të nxitojë për të firmosur me Kontin. Pasi kanë nënshkruar me Mateo Musaçio, Frank Kessie (gjithashtu nga Atalanta) dhe Rikardo Rodriguez tashmë, synimi i radhës i kuqezinjve është mbrojtësi i djathtë. Atalanta dëshiron më shumë se 20 milionë euro që ofrojnë drejtuesit e Milanit, por plani është që të japin një lojtar ose dy në shkëmbim, me Manuel Lokatelli, i cili ka shkëlqyer këtë sezon, një nga objektivat e Giampiero Gasperinit.