Интерес за вакцинација против ковид-19, помалку хоспитализирани пациенти и активни случаи

4

Во спортскиот центар „Борис Трајковски“ во Скопје и во останатите шест регионални пункта низ државата и вчера продолжи масовната вакцинација на населението, која, според Министерството за здравство се одвива непречено, а интересот за вакцинирање секојдневно се зголемува. Вакцина вчера прими премиерот Зоран Заев, а за денеска е најавено дека ќе се вакцинира и министерот за здравство Венко Филипче, кои постојано апелираат граѓаните да се пријават и да се вакцинираат.

– Вакцините се безбедни, проверени, тестирани и навистина колку побрзо заврши процесот на имунизација, толку побрзо ќе заврши борбата со овој невидлив непријател пандемијата од ковид-19. Важно е масовно да се учествува во процесот за имунизација за да се промени целокупната слика на епидемијата во позитивна смисла и полека да го постигнеме колективниот имунитет, порача Заев, откако во СЦ Борис Трајковски ја прими првата доза од вакцината против ковид-19 од кинескиот производител „Синофарм“.

Тој ги охрабри сите граѓани кои досега не се пријавиле за вакцинација на веб страницата vakcinacija.mk, да го направат тоа што поскоро и со тоа, како што нагласи, да си го обезбедат единствениот ефикасен начин за заштита од коронавирусот.

Верува дека со дозите вакцини што пристигнаа минатата седмица, како и со сите договорени и потврдени количини што треба да пристигнат во претстојниот период, дека е можно до почетокот на летото да имаме висок процент население кое ќе биде вакцинирано, што ќе придонесе за целосно менување на сликата на епидемијата кај нас.

Кинескиот амбасадор Џанг Ѕуо вчера при посетата на вакциналниот пункт во поликлиниката „Јане Сандански“ изрази задоволство што 200-те илјади дози вакцини од „Синофарм“ ковид-19 што беа испорачани на крајот на април и се од помош на Северна Македонија за да изврши масовна вакцинација.

– Како што сме сведоци и премиерот Заев само што беше вакциниран со вакцината „Синофарм“, што е уште еден пример за пријателски односи меѓу Кина и Северна Македонија, демонстрирајќи ја целосната македонска доверба во кинеската вакцина која ја одразува добрата волја на Кина за активна поддршка на Северна Македонија во заедничка борба против епидемијата, изјави амбасадор Ѕуо.

Покрај сегашната огромна домашна побарувачка за вакцини, наведе амбасадорот, Кина ги надмина тешкотиите и обезбеди поддршка за Северна Македонија и другите земји, сѐ со цел да работиме заедно за да изградиме заедница за заедничка иднина за човештвото. Вакцината е моќно оружје за надминување на епидемијата и сите страни треба да ја зајакнат меѓународната соработка за вакцините за да не остане ниту една земја во која има потреба од истите. Никој што чека вакцина не е заборавен. Кина е подготвена да продолжи да ги продлабочува практичните размени со Северна Македонија, да работиме заедно во борбата против епидемијата и да промовираме економско закрепнување за придобивки на нашите земји и народи, порача амбасадорот Ѕуо.

Како што соопштија од Министерството за здравство, на вакциналните пунктови во државата, заклучно со завчера вакцинирани се вкупно 74 076 граѓани. Прва доза вакцина завчера примиле 7 963 граѓани, а вкупно се вакцинирале 9 123 граѓани. Во државата вкупно вакцина и ревакцина примиле 92 253 граѓани. Со последните бројки 25 отсто од населението над 70 години имаат примено барем една доза вакцина.

Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб-страницата vakcinacija.mk, како и лица вработени во критична инфраструктура. Покрај во А1 СЦ „Борис Трајковски” во Скопје и во спортските сали во Кавадарци, Куманово, Тетово, Штип, Битола и Охрид, здравствените власти најавија дека набрзо ќе бидат отворени и регионални вакцинални пунктови и во Велес и во Прилеп. Од општинските власти се бара да направат напори за отворање регионални центри за да се доближи местото за вакцинирање до граѓаните.

Според последните податоци на МЗ, бројот на хоспитализирани пациенти со ковид-19 се намали на 926, а за болничко лекување се на располагање 800 слободни кревети. Во претходното деноноќие од направени 2 660 тестирања беа регистрирани 324 нови случаи на ковид-19, починаа 26 лица, а како оздравени се евидентирани уште 1 178 пациенти. Од почетокот на епидемијата во државава се дијагностицирани 153 461 ковид позитивни, починаа 5 042 лица. Активни се 11 874 случаи, најмногу во Скопје 5 445, а во останатите градови се под 1000. Во Куманово има 935, во Прилеп и во Тетово по 485, односно 480, Велес 413, Гостивар 306.

По намалувањето на времетраењето на полицискиот час кој од завчера е во сила од 23 часот навечер до 5 часот наредниот ден, како и продолжувањето на работно време за терасите на угостителските објекти, за дополнителни олабавувања на рестриктивните мерки ќе се одлучува на почетокот на следната недела.