E ardhmja e trajnerit Stefano Pioli në stolin e Milan është në dilemë. Pronarët amerikanë nuk janë të kënaqur me rezultatet e fundit, ndaj pritet që të ketë një revolucion së shpejti. atij i është lënë një afat, ku duhet të rikthejë ekipin në binarët e duhur.
Nëse nuk ndodh një mrekulli, Pioli vështirë se do të jetë trajner i kuqezinjve sezonin tjetër, ndaj dhe largimi i tij është i paevitueshëm. Madje ka gjasa që ai të ndodhë edhe më herët, që këtë sezon nëse situata mbetet e njëjtë.
Nëse Pioli shkarkohet, te Milan nuk pëlqejnë që të mbajnë një trajner provizor deri në fund të sezonit. Ndaj klubi po lëviz dhe dy janë kandidatët e mundshëm për t’i zënë vendin: Antonio Conte dhe Roberto De Zerbi.
I pari është pa skuadër prej gati 9 muajsh, që kur u largua nga Tottenham, ndërsa i dyti drejton aktualisht Brighton në Premier League. Nëse për De Zerbi ardhja te Milan është e vështirë, pasi ka një detyrë, Conte mund të vijë në çdo moment, pasi është pa skuadër.
Sipas “La Reppublica”, ai që këmbënbul për Conte është pikërisht Zlatan Ibrahimovic, që e pëlqen shumë ish-trajnerin e Juventus dhe Inter. Suedezi ka fuqi të plota për të vepruar në merkato, ndaj gjithçka mund të ndodhë.
