Grupi i deputetëve të VMRO-DPMNE-së dhe Koalicioni “Maqedonia juaj” nuk do ta mbështesin interpelancën e zëvendëskryeministrit të parë dhe ministër i Mjedisit Jetësor dhe Planifikimit Hapësinor Izet Mexhiti, të dorëzuar nga “Fronti Evropian”.
Siç tha deputeti Lupço Prenxhov në vazhdim të debatit parlamentar për interpelancën, BDI “shet” patriotizëm të rremë, dhe çdo përpjekje për përkeqësim të marrëdhënieve ndëretnike jo vetëm që nuk është e mirë për askënd, por as nuk do ta kthejë rejtingun e humbur të partisë.
Prenxhov i bëri thirrje BDI-së që të kapërcejë vetveten, t’i lë anash interpelancat dhe të mbështesë masat e Qeverisë për standard më të mirë dhe jetë më të mirë për të gjithë qytetarët, që t’i bashkohet ndryshimeve dhe të veprojë si opozitë me politika të duhura, konstruktive.
“E dimë se si do të përfundojnë interpelancat e BDI-së. Është mirë që koordinatori Blerim Bexheti nuk po qan më për pushtet, por për faktin se do të qëndrojë gjatë në opozitë. Keni vështirësi në të folur, disa prej jush belbëzojnë, nuk keni qëndrim, arsye dhe vizion të qartë. Defokusimi i asaj që po ndodh në shoqëri në imazhin e patriotizmit të rremë nuk i bën dobi askujt. Përpjekja për përkeqësim të marrëdhënieve ndëretnike nuk është e mirë dhe nuk do të rivendosë vlerësimet tuaja të humbura, as nuk do të rikthejë besimin tuaj të humbur të votuesve. Ajo ka pasoja vetëm për 99.99 për qind të popullsisë. Ju duhet të mbështesni masat e Qeverisë që janë me interes për të gjithë. Nuk e theksuat asnjë fjalë se rritja e pensioneve është për të gjithë, se autostradën e re nga Tetova në Gostivar do ta kalojmë të gjithë. Atë dëshpërim tuajin që e shohin votuesit, në tetor do t’jua tregojnë shumë më qartë, sepse padyshim nuk e kuptoni pulsin e njeriut të thjeshtë. Para zgjedhjeve nuk premtojmë urrejtje dhe se do të grindim qytetarët, por një jetë më të mirë”, thekson Prenxhov.
BDI, siç shtoi ai, duhet të merret me reforma dhe masa për të gjithë qytetarët.
“Ajo që ishte më parë nuk ekziston më, tani jemi të gjithë të barabartë para ligjeve. Vendi nuk ka nevojë për diskutime të pakuptimta, por për standard të qëndrueshëm, më të mirë, prosperitet, shëndet dhe arsim më të mirë. Bashkohuni me ndryshimet si opozitë dhe veproni me armët e duhura. Ne nuk do të mbështesim interpelancat, ne mbështesim vetëm politika për zhvillimin e të gjithëve, për një të nesërme më të mirë për të gjithë”, nënvizoi deputeti i VMRO-DPMNE-së dhe Koalicioni.
Interpelancën për Mexhitin e shpjegoi Bexheti, duke theksuar se Fronti Evropian kërkon përgjegjësi politike dhe dorëheqje nga zëvendëskryeministri i parë dhe ministër. Si arsye për interpelancën ai ka përmendur rastin e 28 nëntorit me djegien e flamurit shtetëror, Balancuesin, vendimet e Qeverisë për fshirjen e diasporës dhe Ligjin për gjuhët.
Mexhiti në përgjigje ka thënë se interpelanca nuk ka të bëjë me të, as me gjuhën shqipe, as balancuesin apo përfaqësimin e drejtë, por me dëshirën që BDI të kthehet në pushtet.
Kuvendi më herët, në kuadër të seancës së 29-të, ka votuar interpelancën për Ilire Dautin, të paraqitur nga grupi parlamentar i të Majtës. Para deputetëve ka edhe tri interpelanca, për punën e zëvendëskryeministrit Ivan Stoilkoviq, ministrit të Punëve të Brendshme Pançe Toshkovski dhe zëvendësit të tij, Astrit Iseni, të gjitha të parashtruara nga koalicioni “Fronti Evropian”.
