Riga, i fshehur në Baltik, ofron një kombinim të mrekullueshëm të historisë, arkitekturës dhe natyrës, një qytet i pasur me trashëgimi kulturore është një destinacion i paharrueshëm për ata që kërkojnë autenticitet dhe qetësi larg turmave
Në mes të Evropës, përtej qyteteve të njohura që janë bërë sinonim të turizmit dhe aventurave ndërkombëtare si Parisi, Londra, Roma dhe Barcelona ka edhe qytete që nuk janë aq të mbushura me turma, por që mbartin brenda tyre një thesar të vërtetë të historisë, arkitekturës dhe kulturës. Riga, kryeqyteti i Letonisë, një ndër qytetet më të vjetra të Baltikut dhe ka një trashëgimi të pasur që daton që nga shekulli i 13-të është një prej këtyre destinacioneve të fshehura që ndodhet larg syrit të shumë udhëtarëve, por që është një bukuri e vërtetë e kontinentit evropian. Ka shumë arsye pse Riga është një destinacion i paharrueshëm për çdo udhëtar. Së pari, ajo mbetet një nga kryeqytetet më të përballueshme dhe ofron një mundësi të shkëlqyer për ata që duan të eksplorojnë një qytet autentik dhe të pasur me histori dhe kulturë, larg nga grumbujt e turistëve dhe hotelerive masive.
PËRJETONI PAMJEN E MREKULLUESHME NGA KISHA E SHËN PJETRIT
Nëse ka një vend që është i domosdoshëm për t’u vizituar në Riga, është pa dyshim Kisha e Shën Pjetrit. Kjo kishë, një ndërtesë mesjetare që mbikëqyr qytetin përmes majës së saj të lartë është një shembull i mrekullueshëm i arkitekturës gotike dhe mbetet një simbol i fuqishëm i Rigës.
KISHA E SHËN PJETRIT
Ajo ka qëndruar aty për më shumë se pesë shekuj, duke kaluar shumë periudha historike dhe duke mbajtur vazhdimisht vlerat e qytetit. Përveç mundësisë për të vizituar brendësinë e saj dhe për të shijuar atmosferën mesjetare të këtij monumenti të jashtëzakonshëm, ngjitja në majën e kësaj kishe është një nga përvojat më të jashtëzakonshme që mund të keni në qytet.
Në largësi shihen kulmet e ndritura të qytetit, ndërtesat karakteristike, dhe shtëpitë e vjetra të qytetit të vjetër, që duken si copa të vogla të një pikture. Ky vend është një mundësi e shkëlqyer për të kapur në fotografi bukurinë e Rigas nga lart. Dhe më e mira është se për të arritur në majë, nuk është nevoja të ngjitni shkallët e larta – një ashensor do t’ju çojë direkt në majë, duke ju mundësuar të shijoni bukurinë e Rigas pa u lodhur.
TRE VËLLEZËRIT E FAMSHËM
Ndërsa eksploron pjesën e vjetër të Rigas, nuk duhet të humbësh mundësinë për të bërë një foto të famshme të tre vëllezërve. Këto tre shtëpi që ndodhen pranë njëra-tjetrës, secila me një stil të veçantë arkitektonik: Gotik, Renesancë dhe Barok. Këto ndërtesa janë një udhëtim nëpër kohë, dhe duke shëtitur pranë tyre, mund të kuptoni evolucionin e qytetit dhe ndikimet që ka pasur historia e tij mbi arkitekturën dhe kulturën e tij .
Shtëpitë janë të vjetra që nga shekulli i 15-të dhe janë ruajtur me shumë kujdes. Sot, ato strehojnë Muzeun e Arkitekturës dhe Qendrën Kombëtare të Mbrojtjes së Monumenteve Kulturore, duke ofruar mundësinë për të mësuar më shumë rreth trashëgimisë kulturore të Rigës dhe Letonisë. Për ata që janë të apasionuar pas artit dhe historisë, ky vend është një mundësi e shkëlqyer për të zbuluar se si arkitektura e qytetit ka evoluar dhe si çdo ndërtesë tregon një histori të vetën.
SHËTITJE NË PARKUN BASTEJKALNS
Nëse dëshironi të shijoni një atmosferë të qetë dhe të freskët, Parku Bastejkalns është një destinacion i duhur për ty. Ky park, që ndodhet në zemër të qytetit, është një oazë e qetësisë, dhe ofron një mundësi perfekte për t’u larguar nga zhurma e qytetit. Urat e bukura, skulpturat intriguese dhe shtatoret historike e bëjnë këtë park një vend të veçantë për të shëtitur dhe për të shijuar natyrën. Përveç kësaj, , një mundësi tjetër për të shijuar bukurinë e këtij parku është një tur me anije në Kanalin e Rigës, i cili kalon përmes këtij parku, duke ofruar një këndvështrim të jashtëzakonshëm të qytetit dhe natyrës që e rrethon.
Gjatë sezonit të pranverës dhe verës, parku është veçanërisht magjepsës, pasi lulet dhe bimësia krijojnë një peizazh të papërsëritshëm, ideale për të pushuar dhe për t’u relaksuar. Në sheshin që ndan parkun në dy pjesë, do të gjesh Monumentin e Lirisë, një memorial për ushtarët e rënë gjatë Luftës së Pavarësisë të Letonisë.
SHESHI I BASHKISË I MBUSHUR ME HISTORI DHE ARKITEKTURE
Një tjetër atraksion i jashtëzakonshëm është Sheshi i Bashkisë, i cili është një vend piktoresk i mbushur me ndërtesa të vjetra, të pasura me histori. Ky shesh është i rrethuar nga ndërtesa të ndryshme historike, përfshirë Bashkinë e Rigas, një ndërtesë gotike. Vizitorët që ndodhen në këtë shesh mund të ndihen si udhëtarë të kohëve të kaluara, duke ecur nën hijen e mureve të vjetra dhe duke reflektuar mbi historinë që është shkruar. Gjithashtu është një vend i shkëlqyer për të ndaluar dhe për të marrë një kafe, duke shijuar atmosferën e qetë të qytetit të vjetër.
RRUGËT E ART NOUVEAU
Rruga Alberta është një thesar i Rigas, ku mund të shihni një koleksion të jashtëzakonshëm ndërtesash Art Nouveau. Kjo lagje, e zhvilluar në periudhën 1901-1908, është një shembull i shkëlqyer i një stili arkitektonik që i ka dhënë Rigas një reputacion të veçantë në botën e arkitekturës. Ndërtesat janë të dekoruara me linja të rrjedhshme dhe skulptura të mrekullueshme, që e bëjnë çdo shëtitje përgjatë kësaj rruge një përvojë të paharrueshme. Një shëtitje përgjatë kësaj rruge është një përvojë që do t’ju mahnisë. Secila ndërtesë është një krijim i veçantë dhe një art në vetvete, duke treguar mjeshtërinë dhe bukurinë e arkitekturës së periudhës.
KATEDRALET NË RIGA
Një nga vendet që çdo vizitor duhet të vizitojë është Katedralja e Rigas, një nga kishat mesjetare më të mëdha në rajonin Baltik. Përveç bukurisë së jashtme, brenda saj mund të shihni artin dhe detajet e shkëlqyera që lidhen me periudhën mesjetare. Ndërsa shijoni bukurinë e katedrales, mund të bëni një ndalesë në Sheshin e Dome, një vend i mrekullueshëm që është i mbushur me restorante dhe kafene, duke ofruar një mundësi për të pushuar dhe për ta shijuar.
Më pas, pas një ecjeje të shkurtër, mund të vizitoni Katedralen Ortodokse të Nativitetit, një shembull tjetër i arkitekturës, me kupola të arta dhe mozaikë të detajuar . Kjo katedrale është një shembull i jashtëzakonshëm i ndikimit të arkitekturës ortodokse dhe ofron një pamje të mahnitëse për ata që duan të shohin një stil tjetër të dizajnit të kishave.
EKSKURSIONI NË JURMALA
Përfundoni udhëtimin tuaj me një ditë ekskursioni në Jurmala, një qytet bregdetar që ndodhet vetëm 30 minuta larg me tren nga Riga. Ky qytet është i njohur për plazhet e tij të bukura me rërë, arkitekturën e drunjtë dhe atmosferën relaksuese. Jurmala është një vend ideal për t’u larguar nga ritmi i shpejtë i qytetit. Plazhet e saj të gjata, ujërat e pastër dhe ajri i freskët janë të mrekullueshëm për ata që kërkojnë një pushim të qetë. Në Jurmala, mund të shijoni një ditë të qetë plazhi, të shëtitni përgjatë shëtitores dhe të relaksoheni në spa.
Gjatë shëtitjes në Rrugën Jomas, mund të bëni shopping, të shijoni kafenetë dhe restorantet lokale dhe të përjetoni një atmosferë që është shumë ndryshe nga ajo që ofron Riga. Riga, me pasurinë e saj kulturore, arkitekturën mbresëlënëse dhe natyrën e qetë, është një nga destinacionet që duhet ta vizitoni. Fshehur larg nga turma, Riga është një vend që do t’ju çudisë dhe do t’ju lërë me kujtime që do t’ju shoqërojnë gjatë gjithë jetës.
