Bilanci natyror i popullsisë vazhdon të mbetet negativ, konkretisht 418 persona, duke treguar se numri i vdekjeve e tejkalon ende numrin e lindjeve të gjalla
Albina REKA
Shkup, 27 nëntor – Në tremujorin e tretë të vitit 2025, sipas të dhënave të Entit Shtetëror të Statistikave ofrojnë një pasqyrë të detajuar të ndryshimeve demografike në vend nënvizojnë tendencat kryesore që po formësojnë strukturën e popullsisë. Krahasuar me të njëjtën periudhë të vitit 2024, shihet një lëvizje pozitive në aspektin e natalitetit.
Numri i lindjeve të gjalla është rritur dhe ka arritur në 4.431 lindje, duke shënuar një rritje prej 3.7 për qind. Ky zhvillim tregon një rigjallërim të lehtë të ritmit të lindjeve, si dhe një ndryshim të moderuar në sjelljen demografike lidhur me formimin e familjes dhe planifikimin familjar.
Ndërkohë, numri i vdekjeve ka shënuar një ulje të vogël. Gjatë këtij tremujori janë regjistruar 4.849 vdekje, ose 0.5 për qind më pak se një vit më parë, mes të cilave përfshihen edhe 20 vdekje foshnjore. Kjo rënie sugjeron një stabilizim të nivelit të mortalitetit, por jo aq të mjaftueshëm sa të ndikojë pozitivisht në rritjen natyrore. Si rezultat, bilanci natyror i popullsisë vazhdon të mbetet negativ, konkretisht 418 persona, duke treguar se numri i vdekjeve e tejkalon ende numrin e lindjeve të gjalla.
Sa i përket ngjarjeve familjare, të dhënat evidentojnë një tendencë në rënie në lidhjen e martesave. Në këtë tremujor janë regjistruar 3.514 martesa, që përfaqësojnë një ulje prej 2.8 për qind krahasuar me periudhën e njëjtë të vitit 2024. Kjo rënie mund të lidhet me ndryshimet sociale, ekonomike apo preferencat e brezave të rinj.
Paralelisht, numri i divorceve ka shënuar një rritje të theksuar. Janë regjistruar 470 divorce, që nënkuptojnë një rritje prej 27.7 për qind krahasuar me vitin e kaluar, duke reflektuar ndryshime të dukshme në qëndrueshmërinë dhe dinamikën e martesave.
Në tërësi, të dhënat e këtij tremujori paraqesin një përzierje të lëvizjeve pozitive dhe negative: rritje të lindjeve, ulje të lehtë të vdekjeve, më pak martesa dhe më shumë divorce. Megjithatë, në planin e përgjithshëm demografik, sfida kryesore mbetet rritja natyrore e vazhdueshme negative, e cila pasqyron presionin mbi strukturën afatgjatë të popullsisë. (koha.mk)
