Grupi i tifozëve “Shvercerat” nga Shkupi nuk do të kenë mundësi ta përcjellin nga afër ndeshjen ndërmjet Shqipërisë dhe Izraelit, e cila zhvillohet sonte në ora 20.45 në stadiumin “Elbasan Arena”. E gjithë kjo, siç mëson gazeta KOHA, nga shkaku se policia kufitare e Shqipërisë nuk i ka lejuar ata të kalojnë kufirin në “Qafa Thanë” , duke mos u dhënë atyre asnjë sqarim se pse është sjellë një vendim i këtillë. “Shvercerat Shkup ndalohen në kufirin ‘Qafa Thane’. Arsyet nuk i dimë”, kanë shkruar në faqen e tyre grupi I tifozëve nga Shkupi.
“Na thanë se i kanë të gjitha emrat tonë dhe se e kemi të ndaluar të hymë në Shqipëri”, thonë për KOHA disa nga anëtarët e grupit, duke na e dërguar edhe dokumentin e refuzimit të hyrjes në kufi, ndërsa e njëjta ishte firmosur nga Ministria e Punëve të Brendshme të Shqipërisë. Omer Bunjaku, lider i “Shvercerave” thotë se sjellja e policisë nuk ka qenë jokorrekte, përveç asaj se asnjëri nga punonjësit kufitar shqiptarë nuk dha arsye se pse u mohohet hyrja në Shqipëri. Mbi 50 anëtarë të grupit të mirënjohur nga Shkupi ishin nisur në mënyrë të organizuar me vetura private për ta përcjellë nga afër këtë ndeshje. (B.K)
