Gjykata Themelore në Prishtinë ka vendosur që të vazhdojë masën e paraburgimit për dy muaj të tjerë ndaj Naim Murselit, Kushtrim Kokallës dhe Granit Plavës, të cilët dyshohen për vrasjen e Liridona Ademajt
Lajmi është konfirmuar për Telegrafin, nga zëdhënësja e Gjykatës Themelore në Prishtinë, Mirlinda Gashi.
“Pas kërkesës së Prokurorisë Themelore në Prishtinë për vazhdimin e masës së paraburgimit në çështjen penale kundër të pandehurve N.M., G.P., dhe K.K., Gjykata Themelore në Prishtinë – Departamenti për Krime të Rënda, më 20 dhjetor 2024, ka marr Aktvendim dhe ka aprovuar kërkesën e Prokurorisë. Masa e paraburgimit ndaj të pandehurve është vazhduar për dy muaj, nga data 24 dhjetor 2024 deri më 23 shkurt 2025”, thuhet në përgjigjen e gjykatës.
Të dyshuarit akuzohen për një nga rastet më të rënda kriminale, që ka tronditur opinionin publik në Kosovë.
Procesi gjyqësor ndaj tyre po vazhdon në Gjykatën Themelore në Prishtinë.
