Presidenti iranian, Masoud Pezeshkian, ka paralajmëruar se politikat dhe veprimet e presidentit të Shteteve të Bashkuara, Donald Trump, mund të shkaktojnë përshkallëzim të rrezikshëm të tensioneve në Lindjen e Mesme.
Në një intervistë për rrjetin amerikan NBC News, Pezeshkian deklaroi se megjithëse administrata e Trump pretendon se po punon për paqen, hapat që ka ndërmarrë SHBA-ja rrezikojnë të ndezin një konflikt të madh rajonal.
“Trump thotë se qëllimi i tij është të sjellë paqe, por rruga që ka zgjedhur mund të përfundojë duke i vënë flakën të gjithë rajonit,” u shpreh Pezeshkian.
Ai shtoi se Irani kurrë nuk ka qenë agresor në konfliktet ndërkombëtare. “Nuk kemi nisur asnjëherë luftë dhe nuk do ta bëjmë as në të ardhmen. Por nëse sulmohemi, do të përgjigjemi fuqishëm,” tha presidenti iranian.
Sipas tij, vendi po punon për të përmirësuar kapacitetet mbrojtëse në mënyrë që të shmangë çdo kërcënim të jashtëm.
“Ne do të forcojmë çdo ditë aftësitë tona për të parandaluar sulme të mundshme,” shtoi ai.
Deklaratat e Pezeshkian erdhën pas një operacioni ushtarak të ndërmarrë nga SHBA në muajin qershor, gjatë të cilit shtatë bombardues strategjikë amerikanë B-2 hodhën bomba mbi objektiva të rëndësishme bërthamore në Iran.
Presidenti Trump, duke folur para Asamblesë së Përgjithshme të OKB-së, vlerësoi këtë veprim ushtarak si një arritje të madhe. “Asnjë vend tjetër në botë nuk do të kishte guxuar të bënte atë që bëmë ne. Ne kemi armët më të fuqishme në planet – edhe pse i urrejmë luftërat, jemi të përgatitur,” deklaroi Trump.
