FJALA E BOTUESIT
E mërkurë, 22 nëntor 2006. Logoja e së përditshmes KOHA dhe portalit koha.mk të jetë me sfond të kuq apo të kaltër? Kjo dilemë, ekipin e kësaj gazete të re e ka shoqëruar deri në ditën e sotme kur edhe numri i parë i saj është në duart e lexuesve Kundërshtarët e “së kuqes” por edhe të “së kaltrës”, kishin argumente interesante, ku të parët thoshin që të mos i ngjajmë ngjyrave të logos së njërës parti shqiptare, ndërsa të dytët të mos i ngjajmë tjetrës. Megjithatë, gjërat kaluan në realitet kur një koleg e zgjodhi këtë dilemë duke qenë i prerë në atë se “çfarëdo logoje të zgjedhim – llafet nuk do të ndalen, andaj të mos çajmë kokën, të ecim para dhe të zgjedhim të veçantën”.
Debat i njëjtë, por me “ton” më pak polemizues është zhvilluar edhe rreth asaj që numri i parë i gazetës të del me 22 nëntor – Ditën e Kongresit të Manastirit, e cila tashmë është festë shtetërore apo me 28 nëntor – Ditën e Flamurit Kombëtar. Edhe këtu dominoi e veçanta – ajo se 22 nëntori është ngjarje që ka ndodhur tek ne në Maqedoni.
Do t’i përkrahim dhe do t’i kritikojmë edhe të parët edhe të dytët. Pra të kuqtë dhe të kaltrit.
Krejt këto kritika apo lëvdata do të jenë të koordinuara vetëm nga një qendër, e ajo është redaksia e gazetës KOHA, ekipi i të cilit fatmirësisht deri më tani është i dëshmuar edhe nëpër media tjera ku kanë punuar, se dinë të bëjnë gazetë dhe portal, edhe atë shumë të mirë – i pëlqeu apo jo ndonjë strukturë e caktuar politike ose apolitike.
Betejën për të dhënë vlerësim do t’a pranojmë vetëm me lexuesin e me askënd tjetër, sepse kemi guximin të themi troç se, “përveç publikut – karshi të gjithë të tjerëve jemi më kompetent”.
Nuk do të bëjmë politikë, këtë do ua lëmë atyre që kanë mandat dhe paguhen nga tatimet tona për këtë, por do të mundohemi sa më denjësisht të jemi zëdhënës dhe mbrojtës të interesave të publikut apo thënë shkurt – lexuesve. Edhe data e daljes së gazetës dhe portalit jorastësisht është zgjedhur 22 nëntori, dita kur në vitin e largët të 1908-ës ka filluar me punë Kongresi i Alfabetit në Manastir. Pra, mëtojmë ë ta “kopjojmë” në jetëgjatësi Alfabetin e miratuar në Manastir si dhe në mënyrë sado simbolike, të kemi një lidhje me një nga ngjarjet më të mëdha të kulturës dhe historisë së shqiptarëve të ndodhur këtu tek ne.