Agresioni mund të jetë ngjitës, sugjeron një kërkim i ri. Shkencëtarët thonë se njerëzit që shohin në mënyrë të përsëritur sjellje agresive kanë më shumë gjasa të përfshihen vetë në sjellje të dhunshme. Studiuesit në Shkollën e Mjekësisë të Southern University of Illinois në Shtetet e Bashkuara përdorën minj për të eksploruar faktorët mjedisorë dhe mekanizmat nervorë që çojnë tek agresioni që dëshmitarët e marrin më vonë. Në një eksperiment të krijuar nga ekipi, minjtë panë të njohur ose të panjohur duke sulmuar minj furacakë.
Vetëm meshkujt dëshmitarë shfaqën më vonë agresion të shtuar, dhe kjo ndodhi vetëm pasi panë shokë të njohur të sulmonin pushtues. Studiuesit regjistruan aktivitetin e neuroneve në një pjesë të amigdalës së minjve, e cila lidhet me gatishmërinë për agresion.
Udhëheqësi i studimit, dr. Jacob Nordman, tha: “Ne më parë kemi zbuluar se këto neurone përfshihen në një efekt gatishmërie për agresion, që do të thotë se të qenit autor i një sulmi rrit gjasat për të sulmuar përsëri. “Për shembull, imagjinoni të ziheni me një koleg ose me një anëtar familjeje. Pas kësaj, acarimi dhe frustrimi ju bëjnë më të prirë për një shpërthim tjetër”. Studiuesit supozuan se këto neurone mund të aktivizohen tek meshkujt që shohin të njohur agresivë, sepse “familjariteti” i bën ata të pasqyrojnë gatishmërinë për agresion të miqve.
Këto neurone ishin aktive tek meshkujt kur shihnin sulme nga të njohurit, por jo nga të panjohurit. Dr. Nordman shpjegoi se frenimi artificial i këtyre neuroneve uli agresionin e mëvonshëm pas dëshmimit të sulmeve të shokëve, ndërsa aktivizimi i tyre gjatë vëzhgimit të të panjohurve dhunshëm nxitën sjellje agresive tek dëshmitarët më pas.
Ai tha se gjetjet, të publikuara në revistën JNeurosci, hedhin dritë mbi agresionin e mësuar përmes vëzhgimit, duke sugjeruar se jo vetëm afërsia, por edhe njohja e autorëve të dhunës mund të jetë faktor rreziku për sjellje të dhunshme më vonë, të paktën tek meshkujt. Dr. Nordman shtoi: “Ky mekanizëm nervor mund të ndihmojë në zhvillimin e trajtimeve nervore dhe të sjelljes për dhunën e mësuar”.
