Ish-tenisti gjerman Boris Becker, në një intervistë për BBC Sport, ka folur për karrierën dhe jetën e tij. Fituesi i 6 grand slam në karrierë (2 Australian Open, 3 Wimbledon dhe 1 US Open) theksoi se i vjen keq që fitoi Wimbledonin në moshën 17 vjeç, për shkak të presionit nën të cilin ishte.
Becker ishte vetëm 17 vjeç, shtatë muajsh dhe 15 ditësh kur mundi Kevin Curren në finalen e fushës me bar të vitit 1985, duke u bërë lojtari më i ri që fitoi titullin e meshkujve në Wimbledon. “Kjo ishte një recetë për katastrofë“, tha Becker.
Suksesi i Becker shpesh u eklipsua nga një jetë personale e trazuar dhe vështirësi të përsëritura financiare. Në vitin 2023, ai u lirua nga burgu i Londrës pasi vuajti tetë muaj nga një dënim prej dy vitesh e gjysmë për evazion fiskal, që arrinte në një total prej 2.5 milionë paundësh.
“Nëse kujtoni ndonjë fëmijë tjetër të mrekullueshëm, ata zakonisht nuk i arrijnë të 50-tat për shkak të gjyqeve që vijnë më vonë“, tha Becker pas publikimit të autobiografisë së tij të re, në të cilën ai rrëfen kohën e tij në burg.
“Çfarëdo që të bësh, kudo që të shkosh, me këdo që të flasësh, bëhesh një fenomen global. Bëhesh kryelajmi i disa prej gazetave më të rëndësishme të së nesërmes. Dhe ndërkohë, përpiqesh të piqesh, të gjesh vendin tënd në botë”, deklaroi gjermani.
Më tej, Becker tha: “Kur fillon një karrierë të dytë, gjithçka matet me sukses, kur fiton Wimbledon në moshën 17 vjeç. Dhe kjo ndryshoi rrënjësisht rrugën që më shtrihej përpara. Jam i lumtur që kam fituar tre, por ndoshta 17 vjeç ishte shumë i ri. Isha ende fëmijë.”
Për Becker, fillimi i gjithçkaje, i rrugës së vështirë që përfundimisht e çoi në burg, filloi në vitin 1985: “Në moshën 17 vjeç, papritmas u bëra shumë i pasur. Kisha shumë para. Askush nuk më tha ‘jo’: çdo gjë ishte e mundur. Duke parë prapa, kjo ishte një recetë për katastrofë”.
