Klubi i Karatesë Shkëndija nga Tetova do ta përfaqësojë Maqedoninë e Veriut me dy sportistët e vetëm në njërën nga garat më prestigjioze ndërkombëtare të karatesë për të rinj, Karate One Youth League, e cila do të mbahet në Fujairah, Emiratet e Bashkuara Arabe, nga 11 deri më 16 shkurt.
Në këtë manifestim botëror do të marrin pjesë Buna Sherifi dhe Ron Bilalli, të cilët janë përzgjedhur si përfaqësuesit e vetëm nga Maqedonia e Veriut, duke e bërë pjesëmarrjen e tyre edhe më domethënëse për sportin vendor.
Sportistët do të udhëhiqen dhe shoqërohen nga trajneri i klubit, i cili do të jetë i pranishëm gjatë gjithë garës për mbështetje profesionale dhe përgatitje taktike. Ky sukses organizativ dhe sportiv është rezultat i punës së vazhdueshme dhe përkushtimit të klubit, si dhe i angazhimit të drejtpërdrejtë të Vegim Muratit, i cili ka dhënë kontribut të rëndësishëm në realizimin e kësaj pjesëmarrjeje.
Klubi i Karatesë Shkëndija u ka uruar sportistëve suksese dhe paraqitje dinjitoze, duke shprehur besimin se ata do ta përfaqësojnë me krenari vendin dhe klubin në këtë arenë elitare ndërkombëtare.
