Pemët e Amazonës po bëhen më të mëdha. Rritja e tyre në përmasa është përllogaritur në 3.2% çdo 10 vjet, dhe ky fenomen po verifikohet në 30 vitet e fundit. Shkak është rritja e nivelit të CO₂. Fenomeni është studiuar dhe vëzhguar nga një grup ekspertësh nga bashkëpunimi mes universiteteve Cambridge e Bristol dhe është publikuar në revistën shkencore Nature Plants.
Analizimi i dimensioneve të pemëve është kryer në 188 zona të ndryshme, të cilat kanë qenë nën monitorim të vazhdueshëm në pyjet e Amazonës.
Sipas autorëve, pemët e mëdha janë shumë të nevojshme për përthithjen e CO₂ nga atmosfera dhe, përtej shqetësimeve për ndryshimet klimatike dhe pasojave që mund të rrjedhin, vërtetohet se efekti i dioksidit të karbonit në stimulimin e rritjes së tyre është i pranishëm.
Studimi tregon sesa e nevojshme është të mbahen dhe ruhen ekosistemet e shëndetshme, dhe pyjet natyrore kanë impakt të jashtëzakonshëm për jetën në Tokë. Amazon vijon të jetë “mushkëria e Botës”. Por, natyrisht, thirrjet janë për frenimin e shpyllëzimit të saj, pasi nuk mund të krahasohen benefitet e saj me ato të mbjelljes së pemëve të reja, proces i cili duhet të vazhdojë, por nuk mund të zëvendësojë rolin dhe impaktin e Amazonës.
