Hatixhe Qazimi nga Qendra e Autizmit “Fluturo për jetën” tha për gazetën KOHA se sindromi Down nuk është një sëmundje por një çrregullim kromozomik, e që ky sindrom e shoqëron fetusin që në ngjizje të tij e përgjatë gjithë jetës. Ајо tha se institucionet e vendit nuk mund të ofrojnë shërbime në nivel të vendeve evropiane
Anëmsha SHABANI
Shkup, 21 mars – Më 21 mars, në Ditën Botërore të Sindromit Down, bota përshëndet një komunitet të veçantë, një grup njerëzish që përballen me sfida dhe guxim si dhe triumfin në ndryshimin e perspektivave. Çdo vit, zëri i personave me këtë sindrom, si dhe i personave që jetojnë apo punojnë me ta, bëhet më i fortë.
Siç e njohim, Sindromi Down është një gjendje gjenetike që shkakton ndryshime në zhvillimin fizik dhe intelektual të personave që e kanë, por asnjëherë nuk i zbeh forcën e tyre për të qenë frymëzim dhe ndriçim për shoqërinë. Në vend, gjatë viteve të fundit ka pasur përparime në përfshirjen sociale dhe arsimimin e personave me sindromin Down. Megjithatë, ende ka sfida të mëdha që përballen, siç janë qasja në kujdes shëndetësor, punësimi dhe përfshirja e tyre në jetën shoqërore dhe ekonomike.
Nga ana tjetër, Hatixhe Qazimi nga Qendra e Autizmit “Fluturo për jetën” tha për gazetën KOHA se sindromi Down nuk është një sëmundje por një çrregullim kromozomik, e që ky sindrom e shoqëron fetusin që në ngjizje të tij e përgjatë gjithë jetës.
“Njerëzit me sindromin Down zakonisht kanë një farë shkalle paaftësie zhvillimi, por shpesh është e lehtë deri në mesatare. Vonesat e zhvillimit mendor dhe shoqëror mund të nënkuptojnë se një person me Down mund të kenë sjellje impulsive, gjykimi i dobët, hapësirë e shkurtër e vëmendjes si dhe aftësitë e ngadalta e të mësuarit dhe të komunikuarit”, tha Qazimi.
Sot në botë statistikat tregojnë se një në 691 lindje që jetojnë janë me sindromën Down. Prandaj ajo njoftoi se lindja e personave me sindromin Down nuk lidhet me racën, kombësinë, fenë apo statusin socio-ekonomik.
Megjithatë, Qazimi tha se institucionet e vendit nuk mund të ofrojnë shërbime në nivel të vendeve evropiane. “Në vend fatkeqësisht edhe pse me kushtetutë dhe ligj mbrohen të drejtat e personave me aftësi ndryshe, duke përfshirë edhe personat me sindromin Down institucionet e vendit nuk mund të ofrojnë shërbimet në nivel të vendeve evropiane, duke iu siguruar vende punësimi në bazë të aftësive që posedojnë. Barrierat që këta persona përballen çdo ditë si diskriminimi, bullizmi, mospranimi në shoqëri ekziston që nga fëmijëria e tyre e deri në moshën madhore”, theksoi Hatixhe Qazimi, punonjëse sociale.
Ajo bëri thirrje që ne si shoqëri të punojmë në ngritjen e vetëdijes duke organizuar aktivitete të ndryshme, fushata, klube dhe punëtori të ndryshme duke mos i konsideruar si persona të sëmurë por të nxjerrim ne pah aftësitë e tyre, potencialin dhe kontributin që mund të na ofrojnë në shoqërinë tonë. (koha.mk)