Një nga shkaqet kryesore të ndotjes së ajrit gjatë sezonit të ngrohjes është përdorimi i lëndëve djegëse të dëmshme si druri, qymyri apo nafta për ngrohjen e shtëpive. Shumë familje, për shkak të kushteve të vështira ekonomike, nuk kanë mundësi të përdorin burime më të pastra energjie, si ngrohja me rrymë apo gaz natyror
Albina REKA
Shkup, 29 tetor – Me fillimin e sezonit të ftohtë, në shumë qytete të Maqedonisë rritet ndjeshëm niveli i ndotjes së ajrit. Gjatë muajve të dimrit, qytetet si Shkupi, Tetova, Kumanova dhe Manastiri shpesh renditen ndër më të ndoturat në Evropë. Ky fenomen është bërë një problem serioz shëndetësor dhe mjedisor që ndikon drejtpërdrejt në jetën e qytetarëve dhe në cilësinë e jetesës së tyre. Ndotja e ajrit nuk është vetëm një problem estetik apo statistik, por një kërcënim real për shëndetin publik dhe ekuilibrin ekologjik.
Një nga shkaqet kryesore të ndotjes së ajrit gjatë sezonit të ngrohjes është përdorimi i lëndëve djegëse të dëmshme si druri, qymyri apo nafta për ngrohjen e shtëpive. Shumë familje, për shkak të kushteve të vështira ekonomike, nuk kanë mundësi të përdorin burime më të pastra energjie, si ngrohja me rrymë apo gaz natyror. Për ta, drutë janë më të leverdishme financiarisht, por fatkeqësisht më të dëmshme për ajrin dhe shëndetin.
Përveç kësaj, transporti urban me automjete të vjetra, që nuk plotësojnë standardet ekologjike, lëshon sasi të mëdha të gazrave ndotës. Edhe aktivitetet industriale, deponitë e hapura dhe mungesa e kontrollit mjedisor kontribuojnë në përkeqësimin e situatës. Një faktor tjetër që shpesh harrohet është relievi i disa qyteteve të vendit, lugina e mbyllura, mungesa e qarkullimit të ajrit dhe inversioni termik bëjnë që ndotësit të grumbullohen në shtresat e poshtme të atmosferës, duke krijuar mjegull të dendur dhe ajër të rrezikshëm për frymëmarrje.
Për të ulur ndotjen e ajrit, nevojiten masa të menjëhershme, por edhe afatgjata. Shteti duhet të mbështesë përdorimin e energjisë së pastër, të subvencionojë ngrohjen me rrymë ose gaz natyror, si dhe të kontrollojë rreptësishtë ndotësit industrialë dhe deponitë ilegale. Po ashtu, duhet të përmirësohet transporti publik dhe të inkurajohet përdorimi i biçikletave apo ecja në këmbë. Shkollat dhe institucionet arsimore mund të luajnë një rol të rëndësishëm në edukimin mjedisor të brezave të rinj, duke i ndërgjegjësuar për rëndësinë e ajrit të pastër dhe kujdesit ndaj natyrës.
Ndotja e ajrit gjatë sezonit të ngrohjes është një sfidë serioze në vend dhe për shoqërinë tonë në përgjithësi. Ky problem nuk mund të zgjidhet brenda natës, por kërkon përpjekje të përbashkëta nga institucionet, qytetarët dhe komuniteti shkencor. Vetëm përmes bashkëpunimit, investimeve në energji të pastër dhe edukimit mjedisor mund të sigurojmë një ajër më të pastër, një mjedis më të shëndetshëm dhe një të ardhme më të qëndrueshme për gjeneratat e ardhshme. (koha.mk)
