“Ne veprojmë në mënyrë sistematike, përmes bashkëpunimit të shtuar me institucionet e tjera, të gjitha me qëllim parandalimin e krimit të organizuar dhe korrupsionit në të gjitha institucionet që marrin pjesë në procedurat doganore. Këtë vit, përmes Departamentit të Hetimeve, në kuadër të Sektorit të Kontrollit dhe Hetimeve, janë ngritur 67 kallëzime penale kundër 38 personave juridikë dhe 148 individëve për krime të kryera me 181 automjete, ku dëmi i drejtpërdrejtë për Buxhetin arrin në 16.5 milionë denarë. Janë marrë 11 vendime për shkarkimin e nëpunësve doganorë. Kontrollet e shtuara janë një nga faktorët kryesorë për rritjen e mbledhjes së të ardhurave prej 65.5 milionë eurosh që nga gushti i këtij viti. Këto ishin pikat kryesore të Drejtorit të Administratës Doganore, Boban Nikollovski, në emisionin e mbrëmshëm “Pozicioni i Rajonit”, ku ai trajtoi rezultatet specifike të arritura në muajt e fundit, me një fokus të veçantë në masat sistemike për të luftuar korrupsionin, si një nga kërcënimet më të mëdha për sigurinë.
Nikollovski theksoi se përveç kontrolleve të shtuara në periudhën e kaluar, Administrata Doganore ka punuar për të ndryshuar vetëdijen e nëpunësve doganorë me qëllim të efikasitetit më të madh në parandalimin e krimit dhe korrupsionit.
Provë e hapave të ndërmarrë në luftën kundër korrupsionit është raporti i fundit i Komisionit Shtetëror për Parandalimin e Korrupsionit, në të cilin Administrata Doganore renditet e pesta nga gjithsej 72 institucione në zbatimin e politikave të integritetit.
Përveç 11 shkarkimeve të bëra tashmë, dy prej të cilave janë me vendim gjykate, drejtori tha se që nga viti i kaluar janë kryer gjithsej 76 procedura disiplinore. Ai theksoi se nevojitet vullnet i fortë dhe personel i ri që do të mësojë nga më të mirët në Administratën Doganore, dhe se këto janë mënyrat për të luftuar në mënyrë efektive korrupsionin.
