Dyqind vjet më parë, Shildon në verilindje të Anglisë u bë vendi i hekurudhave dhe vendosi bazat e transportit modern
Dy shekuj më parë, më 27 shtator 1825, në qytetin Shildon të qarkut Durham u zhvillua një ngjarje që ndryshoi historinë e udhëtimeve: lokomotiva “Locomotion No 1” tërhoqi trenin e parë me pasagjerë në një hekurudhë publike. Ky moment shënoi lindjen e hekurudhës moderne dhe ndikimi i tij u përhap në të gjithë botën. Sot, muzeu Locomotion në Shildon, me koleksionin më të madh evropian të mjeteve historike hekurudhore, është në qendër të kremtimit të 200-vjetorit të Stockton and Darlington Railway.
Ngjarja përkujton fillimin e një epoke ku Britania u bë pionere e transportit hekurudhor, duke krijuar një model që do të adoptohej globalisht, shkruan BBC. Drejtuesja e festivalit S&DR200, Niccy Hallifax, e përshkroi këtë përvjetor si “një sonet dashurie për rajonin”, duke theksuar se historia e Shildon nuk është vetëm për trenat, por edhe për njerëzit që ndërtuan jetën e tyre rreth hekurudhës.
Rajoni i Durham-it në Angli është djepi i shumë “rekordeve të para botërore” në transportin hekurudhor. Pikërisht këtu ndodhet Shildon, i njohur si qyteti i parë hekurudhor në botë që nga viti 1825, si dhe Heighington Station, stacioni më i vjetër i pasagjerëve që vazhdon të mbahet si monument historik. Në Darlington gjendet Skerne Bridge, ura hekurudhore më e vjetër ende funksionale, ndërsa Middlesbrough njihet si qyteti i parë i planifikuar posaçërisht për hekurudhën. Nga ky rajon u vendos gjithashtu edhe gjerësia standarde e shinave prej 1.45 metra, e shpikur nga George Stephenson, e cila sot përdoret si normë globale, përfshirë edhe rrjetin modern të trenave me shpejtësi të lartë në Kinë.
Përveç këtyre, gjerësia standarde e shinave prej 1.45 metra, e shpikur nga George Stephenson, mbetet sot norma botërore, përfshirë edhe rrjetin me shpejtësi të lartë të Kinës. Fillimisht, hekurudha u ndërtua për transportin e qymyrit, gëlqeres dhe drithërave gjatë Revolucionit Industrial.
Por shumë shpejt, kërkesa për transport pasagjerësh solli revolucionin e udhëtimit. Brenda një viti nga hapja, mbi 30 mijë pasagjerë përdorën shërbimin, ndërsa në vitin 1833 lokomotivat me avull zëvendësuan karrocat e tërhequra nga kuajt. Stockton and Darlington Railway shërbeu si model për vendet e tjera. Inxhinierë nga Franca, SHBA, Gjermania, Norvegjia, Egjipti dhe Argjentina udhëtuan për të studiuar teknologjinë britanike. Kjo çoi në krijimin e rrjeteve të para hekurudhore ndërkombëtare.
Edhe sot, rrjeti i trenave me shpejtësi të lartë në Kinë – më i gjëri në botë – përdor të njëjtën gjerësi shina që Stephenson shpiku në Shildon 200 vjet më parë.
Historia e Shildon-it nuk është vetëm për hekurudhëdashësit dhe udhëtarët që admirojnë bulonat, hekurat, motorët dhe boshtet. Ajo është gjithashtu një tregim frymëzues mbi fuqinë e historisë lokale – sesi një qytet i vogël në County Durham arriti të krijojë valë që ndryshuan përgjithmonë udhëtimin, industrinë dhe vetë konceptin e kohës në mbarë botën.
