Sipas Reuters, Shtetet e Bashkuara i kanë përcjellë presidentit ukrainas Volodymyr Zelensky propozimin e tyre për t’i dhënë fund luftës me Rusinë. Uashingtoni raportohet se i ka kërkuar Zelenskyt të pranojë kornizën e propozuar, e cila përfshin dorëzimin e disa territoreve dhe heqjen dorë nga një pjesë e arsenalit ushtarak, thanë dy burime të informuara mbi çështjen.
Burimet, që folën në kushte anonimiteti për shkak të ndjeshmërisë së temës, thanë se propozimet përfshijnë edhe reduktimin e madhësisë së forcave të armatosura të Ukrainës. Shtetet e Bashkuara kërkojnë që Kievi të pranojë pikat kryesore të draftit.
Sipas burimeve të Financial Times, plani parashikon përgjysmimin e ushtrisë ukrainase, dorëzimin e disa kategorive armësh dhe heqjen dorë nga kontrolli i rajonit të Donbasit. Po sipas këtyre burimeve, Zelensky është i zhgënjyer nga propozimet.
Hartimin e planit thuhet se e drejton emisari i Donald Trump për çështjen e Ukrainës, Steve Witkoff, i cili dyshohet se e ka diskutuar gjerësisht me të dërguarin rus Kirill Dmitriev dhe u ka përcjellë idetë edhe te këshilltari i sigurisë kombëtare të Ukrainës, Rustem Umerov.
