Mbi 300 figura publike përmenden në dokumente.
Pam Bondi ka bërë publike listën e plotë të figurave publike dhe personazheve të njohur që përmenden në dosjet e lidhura me çështjen Jeffrey Epstein.
Lajmi u raportua nga Fox News, duke iu referuar letrës së dërguar Kongresit.
Mes emrave të publikuar janë presidentët amerikanë Donald Trump dhe Barack Obama, ish-Zonja e Parë Michelle Obama, Prince Harry, Bill Gates, Woody Allen, Kim Kardashian, Kurt Cobain, Mark Zuckerberg dhe Bruce Springsteen.
Lista përfshin mbi 300 individë, shumica figura publike ose zyrtarë të njohur, të përmendur të paktën një herë në materialet e çështjes.
Departamenti Amerikan i Drejtësisë sqaroi se përfshirja e emrave ndodh në një “gamë të gjerë kontekstesh” – nga korrespondenca direkte me Epstein ose bashkëpunëtoren e tij Ghislaine Maxwell, deri te përmendje në dokumente që nuk lidhen drejtpërdrejt me aktivitet kriminal.
Ekspertët theksojnë se përfshirja në dokumente nuk nënkupton pjesëmarrje në krime, por publikimi i listës ndihmon publikun dhe hetuesit të kuptojnë më mirë shtrirjen e rrjetit të kontakteve të Epstein.
Publikimi ka nxitur reagime të gjera në SHBA dhe globalisht, sidomos në media dhe rrjetet sociale, për shkak të përfshirjes së liderëve politikë dhe figurave të njohura të argëtimit.
Email-e të publikuara më herët nga arkivi i Epstein tregojnë se financieri kishte tentuar për vite me radhë të organizonte një takim personal me presidentin rus Vladimir Putin.
Ndërkohë, ish-ambasadori britanik në SHBA Peter Mandelson njoftoi dorëheqjen nga Partia Laburiste, duke deklaruar se nuk dëshiron të dëmtojë reputacionin e saj në dritën e zbulimeve të reja që lidhen me çështjen Epstein.
