Një sondazh i ri i modeluar për rajonet (MRP) po trondit skenën politike britanike. Sipas të dhënave më të fundit, Partia Reform, e udhëhequr nga Nigel Farage, mund të fitojë deri në 311 vende në Parlamentin britanik, vetëm 15 vende larg shumicës absolute, një skenar që mund ta vendosë Farage në prag të marrjes së postit të Kryeministrit.
Sipas sondazhit, Partia Reform kryeson me 27% të mbështetjes, përballë 21% të Partisë Laburiste, duke përmbysur pritshmëritë dhe duke sinjalizuar një valë të re kundërshtie ndaj partisë që aktualisht mban pushtetin.
Rritja e Reformës është e jashtëzakonshme. Nga 15% që mori në zgjedhjet e fundit, partia ka kaluar në 27% në këtë sondazh, duke reflektuar jo vetëm rritje të mbështetjes popullore, por edhe përqendrim strategjik në zonat ku fitoret janë të mundshme.
Laburistët parashikohet të humbasin deri në 268 vende, duke mbetur me vetëm 144 mandate në Parlament një rënie dramatike, përtej edhe projeksioneve më pesimiste. Sipas sondazhit, goditja më e madhe për ta vjen nga zonat që historikisht kanë qenë bastione laburiste, por ku Reforma kishte dalë forcë e dytë në vitin 2024.
Nga ana tjetër, edhe Partia Konservatore pritet të pësojë një disfatë të thellë, duke humbur rreth 45 vende dhe duke rënë nën 100 mandate një zhvillim që shënon fundin e një epoke për një forcë që ka qeverisur për më shumë se një dekadë përpara zgjedhjeve të fundit.
Ndryshe nga zgjedhjet e 2024-ës, ku votat e Reformës ishin të shpërndara në mënyrë të tillë që nuk siguronin mjaftueshëm vende, këtë herë strategjia e përqendrimit në zonat kyçe po jep rezultate konkrete, duke transformuar mbështetjen në mandate reale.
Nëse këto parashikime realizohen, Nigel Farage jo vetëm që do të ndryshojë balancat politike në Mbretërinë e Bashkuar, por mund të jetë pranë një fitore historike që pak e kishin parashikuar vetëm pak muaj më parë.
