Të paktën 90 persona, mes tyre edhe fëmijë, u vranë mbrëmë në sulmet izraelite në Rripin e Gazës, ndërsa një ushtar izraelit humbi jetën në përleshjet në atë territor palestinez
“Të paktën 90 persona kanë vdekur, përfshirë 22 fëmijë, nga sulmet ajrore izraelite mbi Rripin e Gazës që po zgjasin që nga mbrëmë”, tha zëdhënësi i Mbrojtjes Civile në Gaza, Mahmud Basal.Ai shtoi se rreth 200 persona janë plagosur, raporton mediumi aljazeera.
Sulmet janë “shkelje e qartë dhe flagrante e marrëveshjes për armëpushim”, pohoi Basal, duke shtuar se situata në Rripin e Gazës është “katastrofike dhe e frikshme”.
Ushtria izraelite njoftoi se një nga ushtarët e saj u vra dje në Rripin e Gazës, pavarësisht armëpushimit që është në fuqi që nga 10 tetori midis Izraelit dhe lëvizjes palestineze Hamas.
Sipas njoftimit, ushtari 37-vjeçar u vra në përleshjet në jug të Rripit të Gazës. Ushtria e akuzoi Hamasin për shkeljen e armëpushimit.
