Arsenali ka ndërtuar një skuadër solide dhe ambicioze nën drejtimin e Mikel Artetës, por jo të gjithë lojtarët e kanë përjetuar njësoj suksesin e “Topçinjve”.
Njëri prej tyre është Ben White, i cili e ka gjetur veten në një rol dytësor dhe jashtë planeve kryesore të trajnerit spanjoll.
Pas një fillimi sezoni ku konkurrenca në mbrojtje është rritur ndjeshëm, White ka humbur statusin e titullarit të padiskutueshëm, dhe sipas raportimeve të gazetarit Graeme Bailey, Manchester City po përgatitet të përfitojë nga situata.
“Sky Blues” e shohin mbrojtësin anglez si një opsion ideal për të forcuar krahun e djathtë dhe për t’i dhënë më shumë thellësi rotacionit të Pep Guardiolës.
Megjithëse kontrata e tij me Arsenal zgjat deri në verën e vitit 2028, lojtari 28-vjeçar po vlerëson mundësinë e një ndryshimi ambienti për të rikthyer vazhdimësinë në karrierë. Për momentin, Arsenali nuk ka treguar shqetësim të madh për situatën, duke besuar se konkurrenca e brendshme është pjesë e procesit të rritjes së skuadrës.
Megjithatë, City po monitoron nga afër zhvillimet, i gatshëm të ndërhyjë nëse White konfirmon dëshirën për t’u larguar.
Një kalim në “Etihad” do t’i jepte atij mundësinë të punonte me Guardiolën dhe të sfidonte për trofetë më të mëdhenj, në një ambient ku fleksibiliteti taktik i tij do të vlerësohej maksimalisht.
