Nëntë minuta në fushë dhe gabimi vendimtar në penallti. Alvaro Morata do të ketë kujtime të hidhura nga finalja e Ligës së Kombeve 2024-25. Kapiteni i Spanjës hyri në fushë në minutën e 111-të të ndeshjes kundër Portugalisë për të zëvendësuar Mikel Oyarzabal.
Penalltia e tij u prit nga portieri Diogo Costa, duke shkaktuar kështu humbjen e skuadrës së tij. Një skenar mizor për kapitenin e La Roja (86 paraqitje, 37 gola), i cili kërkoi falje për gabimin. “Më vjen keq për shokët e skuadrës, por është pjesë e jetës”, tha Morata.
“Falënderoj trajnerin për fjalët e tij. Penalltia? E mora keq, mund të kisha bërë më mirë por nuk mund të bëj asgjë për këtë. Jam i zemëruar, doja të qaja edhe sikur të mos e bëja. Fëmijët e mi ishin në tribuna, dhe në jetë duhet të mësosh. Vitin e kaluar fituam, sot më duhet të kaloj një kohë të vështirë“, shtoi sulmuesi spanjoll.
Morata më pas la të kuptohej se mund t’i ketë dhënë fund eksperiencës me kombëtaren: “Unë mendoj vetëm për atë që ndodhi dje, por ka mundësi që të mos kthehem në shtator në kombëtare”.
Së fundi, ai mbrojti performancën e Lamine Yamal dhe bashkëlojtarëve të tij. “Për mua ishte një paraqitje e nivelit të lartë nga Lamine dhe e gjithë ekipi kombëtar. Natyrisht që mendimet ndryshojnë pas penalltive. Jemi shumë me fat që kemi Lamine në fushë për Spanjën“.
