Tirana përgatitet të presë një nga ndeshjet më të ndezura të këtyre eliminatoreve të Kupës së Botës 2026. Më 7 qershor, “Arena Kombëtare” do të jetë skena ku do të përplasen Shqipëria dhe Serbia; jo thjesht për tri pikë, por për krenari, histori dhe një vend në Botërorin e vitit të ardhshëm. Për ta mbajtur këtë duel nën kontroll, UEFA ka zgjedhur një emër të njohur në arbitrim, italianin Davide Massa.
Me 43 vite mbi supe dhe mbi një dekadë eksperiencë në Serie A, Liga e Kampioneve dhe ndeshje me peshë në arenën ndërkombëtare, Davide Massa nuk është fytyrë e panjohur për futbollin europian. I qetë, me autoritet dhe i mësuar të drejtojë ndeshje me presion të lartë, italiani është një nga arbitrat që UEFA i beson në sfidat ku gjithçka mund të shpërthejë për një vendim të vetëm.
Për tifozët shqiptarë, emri i Massa sjell kujtime të largëta. Ai i ka gjykuar vetëm një herë më parë kuqezinjtë; miqësoren pa shumë bujë të nëntorit 2015 ndaj Gjeorgjisë. Ajo sfidë përfundoi 2-2 në stadiumin “Qemal Stafa”.
Davide Massa nuk do të jetë vetëm në Tiranë. Ai do të ketë përkrah një skuadër arbitrash italianë për të menaxhuar situatat në fushë dhe pas ekranit. Filippo Meli dhe Ciro Carbone do të mbajnë flamujt si asistentë, ndërsa Fabio Maresca do të jetë gjyqtari i katërt. Në dhomën e VAR-it, Aleandro Di Paolo dhe Daniele Doveri do të kujdesen për të siguruar drejtësi teknologjike.
Zgjedhja e një stafi të tillë nuk është rastësore. UEFA e di mirë se Shqipëri-Serbi nuk është një përballje e zakonshme. Përtej rivalitetit sportiv, kjo sfidë ngërthen tensione të trashëguara nga e kaluara, ndaj atmosfera mund të marrë flakë nga momenti në moment.
Për Shqipërinë, kjo do të jetë ndeshja e tretë në këto eliminatore. Pas humbjes ndaj Anglisë dhe fitores ndaj Andorrës, kuqezinjtë kërkojnë të hedhin një hap të madh drejt një ëndrre të madhe; kualifikimit në Botëror. Natyrisht, këtë synim ka edhe Serbia, e cila nuk do të vijë në Tiranë për turizëm. E njohur për fizikun, disiplinën taktike dhe përvojën në ndeshje të mëdha, ajo është një kundërshtar i vështirë, që kërkon dominim në grupin tonë kualifikues.
Në fushë, do të jetë një duel për pikët. Në tribuna, një betejë për krenarinë. Në ajër, një histori që mbart tension, kujtime të hidhura dhe dëshirë të zjarrtë për të fituar. Në mes të kësaj atmosfere të ngarkuar, Davide Massa, i cili do të ketë misionin më të ndjeshëm: të ruajë qetësinë, të garantojë drejtësinë dhe të mos lejojë që loja të dalë nga kontrolli.
Më 7 qershor, Shqipëri-Serbi nuk do të jetë thjesht një ndeshje futbolli. Ajo shihet se provë karakteri për një kombëtare që synon të shkruajë historinë, ndërsa arbitri italian do të përpiqet të garantojë që kjo histori të shkruhet në mënyrë të drejtë.
