“Të jetojë Maqedonia, të jetojë Serbia, të jetojë Republika Sërbska dhe të jetojë Rusia vëllazërore”, tha Millorad Dodik – kryetar i Republikës Sërbska.
Kështu lideri i serbëve të Bosnjës, Millorad Dodik e përfundoi fjalimin skandaloz në teatrin e Shkupit, me rastin e kremtimit të festës nacionale serbe “Shën Spasi”. Dodik e lëvdoi presidentin rus, Putin.
“Putin dhe udhëheqësia bënë gjithçka që të mbrojnë interesat nacionale dhe shtetërore ruse në kohën e duhur”, u shpreh Millorad Dodik – kryetar i Republikës Sërbska.
Më pas mohoi gjenocidin në Srebrenicë dhe dërgoi porosi anti NATO dhe Anti BE.
“Çfarë mbeti nga Europa? Ndonjë vlerë? Cilat vlera? Ku janë? – shtoi Millorad Dodik – kryetar i Republikës Sërbska.
Për gjithë këtë, nga rendi i parë dëshmuan kryeministri Hristijan Mickoski, më shumë funksionarë, si dhe lideri i opozitës Venko Filipçe. Një ditë më pas, Mickoski e kritikoi Dodik.
“Absolutisht nuk pajtohem dhe me të vërtet nuk kam pritur se do ta keqpërdorë atë ngjarje me dërgimin e porosive të tilla, për shkak se megjithatë ishte akademi solemne, e jo vend ku dërgohen lloj i tillë i porosive politike”, potencoi kryeministri Hristijan Mickoski.
Në mënyrë flagrante reaguan nga partia e Boshnjakëve në vend. Ata rikujtuan se Dodik është në listën e zezë të SHBA-ve për shkak të, siç shtojnë, politikave të gjenocidit.
“Dodik e vizitoi Maqedoninë e Veriut që t’i “ndihmojë” në procesin eurointegrues, siç i “ndihmoi” Bosnjës dhe Hercegovinës”, thonë nga Lidhja Demokratike Boshnjake.
Nga BDI theksuan se pushteti po i tejkalon linjat e kuqe, duke pritur një person i cili shpërndan urrejtje dhe ndarje edhe atë në objektin që e simbolizon Marrëveshjen e Ohrit dhe harmoninë ndëretnike.
“Ky akt është një goditje e rëndë për Marrëveshjen e Ohrit. Prania e Dodikut aty është një shuplakë për viktimat e Srebrenicës, për shqiptarët dhe për çdo qytetar që beson në lirinë dhe barazinë”, potencojnë nga BDI.
Përndryshe, ngjarja u organizua nga Organizata joqeveritare serbe, por mysafirët i priti ministri për raporte mes komuniteteve, Ivan Stoillkoviq. Të pranishëm ishin krerët e KOM-itdhe KOS-it, Stefan dhe Porfirij.(Tv21)
