Shkup, 18 mars – Pjesëtarët e MPB-së sot do të mbajnë stërvitje të përbashkët për reagim të shpejtë me Ambasadën e SHBA-së në Shkup. Aktivitetet stërvitore, siç informojnë nga MPB-ja, do të mbahen në qarkun e ambasadës, për shkak të së cilës i informojnë qytetarët se si pjesë e skenarit mund të lëshohen sirena dhe alarme për raste urgjente. “Aktivitetet stërvitore do të kyçin mbyllje me radhë të rrugëve dhe riorientim të qarkullimit në afërsi të ambasadës së SHBA-së gjatë mëngjesit. Stërvitja e përbashkët do t’i mundësojë MPB-së dhe Ambasadës së SHBA-së që në mënyrë më efikase t’i koordinojnë aktivitetet në rast të gjendjes së jashtëzakonshme”, thonë nga MPB-ja.