Ndryshimet kushtetuese dhe nëse Marrëveshja për fqinjësi të mirë me Bullgarinë do të anulohet, Qeverisja me opozitën shqiptare edhe nëse BDI i fiton zgjedhjet në kampin shqiptar, “linjat e kuqe” për partnerin e ardhshëm qeveritar, nëse VMRO – eventualisht fituese e zgjedhjeve… këto dhe për shumë tema tjera përgjigjet në një intervistë ekskluzive kryetari i VMRO-DPMNE-së, Hristijan Mickoski
Bisedoi: Xhenur ISENI
KOHA: Veçmë kemi hyrë në fushatën zgjedhore. Ketë bisedë me ju do ta filloja me një deklaratë tuajën dhënë para katër viteve pikërisht për gazetën tonë. Atëherë shprehët gatishmërinë që të zëvendësohen termi “20 për qind” me “gjuhën shqipe”. A qëndroni ende në atë qëndrim se nga pozita e pushtetit do ta ndryshoni?
MICKOSKI: Shumë herë i jam përgjigjur kësaj pyetje dhe përgjigjja ime është e pandryshuar jo vetëm për mediumin tuaj, por edhe në mediat tjera ma kanë bërë këtë pyetje. Nëse bëjmë një reformë të tillë, del jashtë kornizës së Marrëveshjes së Ohrit, atëherë unë do doja të bisedoj edhe për disa pjesë të tjera të cilat ndoshta popujve të tjerë, siç është shumica në Maqedoni do ta kishin me rëndësi, jo vetëm të asaj shumicë që është maqedonase, por edhe të tjerët, ajo është të bisedojmë për Badenterin dhe Balancuesin. Të shohim nëse Badenteri dhe Balancuesi disi e kaluan kohën e tyre dhe nëse tani në këtë moment edhe Badenteri edhe balancuesi janë më shumë frenues sesa “rrahje shpinës”. Unë mendoj se janë më shumë frenues sesa “rrahje shpinës”. Shihni se çfarë po ndodhë. Sot në opinion ju keni institucione shtetërore ku shqiptarët paraqiten si maqedonas, maqedonasit si shqiptarë, e kështu me radhë…pse, sepse ekziston rregulli Balancues dhe rregulli Badenter. Unë mendojë se nëse bëjmë një reformë të tillë që do të del jashtë kornizës së Marrëveshjes së Ohrit, atëherë do të duhet pak më shumë ti qasemi.
KOHA: Të gjitha anketat serioze, të cilat po publikohen kohën e fundit, tregojnë se partia Juaj do të jetë fituese e zgjedhjeve. A mund të përsëritet situata e viteve të kaluara kur fituat në zgjedhje, por sërish nuk mundët të formoni Qeveri?
MICKOSKI: Shikoni, këtë e dëgjoj në opinion, qarkullon si tezë dhe përgjigjen time do ta ndajë në dy pjesë. E para – është mirë që të gjithë e pranojnë se VMRO-DPMNE do të fitojë zgjedhjet e ardhshme parlamentare, përshirë edhe Qeverinë. Kur kundërshtari politik pranon se do të jetë i mundur… Thirren në anketa. Nëse thirren në anketa dhe nëse bëjnë projeksion për diçka që do të ndodhë pas anketave, respektivisht pas zgjedhjeve, kjo nënkupton se ata pranojnë se do të humbin. Dhe tani në kushte se si ta mbajnë unitetin e tyre partiak, strukturën e tyre partiake, mënyra e vetme është që këtë tezë ta shpërndajnë në opinion, gjegjësisht të thonë “po, VMRO do të fitojë bindshëm, por nuk do të formojë qeveri”. Dhe tani këtu do ta ndërlidhi pjesën e dytë të përgjigjes time. Kur i dëgjoni njerëzit të udhëheqësisë së BDI-së, kur thonë se “pa BDI-në nuk do të mund të ketë Qeveri, sepse ata do të fitojnë në bllokun shqiptar”, pastaj një person politikisht i margjinalizuar si Menduh Thaçi që fton në luftë nëse BDI-ja dhe të tjerët nuk do të jenë në Qeveri, atëherë parashtrohet pyetja: Si VMRO-DPMNE-në e paramendojnë me 55 deputetë të jetë jashtë Qeverisë, ndërsa BDI me 13-15 deputetë patjetër të jetë në Qeveri?. Pak më duket si kaotike ashtu edhe satirike e gjithë kjo situatë. Por në fund, përgjigjja ima është se VMRO-DPMNE do të fitojë bindshëm, dhe gjithashtu po VMRO-DPMNE do ta udhëheqë në vitet që pasojnë, qeverinë e ardhshme maqedonase.
KOHA: Çfarë është me kapacitetin koalicionues të partisë tuaj, a ka ndryshuar diçka gjatë këtyre viteve. Qëndrimet tuaja janë se dëshironi ta shihni BDI-në në opozitë, por anketat e fundit që po publikohen, madje edhe në anketat e Juaja, del se BDI do të jetë fituese në bllokun politik shqiptar. Vallë, nëse fiton BDI, VMRO nuk do të koalicionojë me partinë e Ahmetit, apo do të ndryshoni qëndrimin?
MICKOSKI: Përgjithësisht, numrat janë të tillë. Por, dallimet janë të mëdha kur shihet dallimi i fitores së VMRO-së karshi LSDM-së dhe fitorja eventuale e BDI-së karshi kampit opozitar shqiptar. Dhe tani, meqenëse shqyrtojë shumë anketa, dhe si parti politike bëjmë shumë anketa, opinioni e sheh vetëm pjesën që është “dalje” të anketave, konkretisht rejtingjet e partive politike. Opinioni nuk mund të sheh “hyrjet” e anketave. Dhe çfarë janë “hyrjet” e anketave? Ato janë pyetjet, se për cilën parti politike keni votuar në zgjedhjet e fundit parlamentare.
Tani, nëse i krahasoni “hyrjet” dhe “daljet” e anketave, në VMRO-DPMNE do të shihni se ka rritje të përqindjes së mbështetjes. Kushtimisht thënë, në zgjedhjet e fundit votuan 18-19%, ndërsa “daljet” tregojnë 23-24%. Në BDI, “hyrjet” janë 8-9%, ndërsa “dalja” është 6.5%-7%, që do të thotë se kemi ulje. Kur të bëhet kjo analizë sociologjike, vijmë në përfundim që BDI do të befasohet për të keq nga rezultati që do t’i ndodhë në zgjedhjet parlamentare. Apo, sipas bindjes sime të thellë, kjo opozitë shqiptare, thënë kushtimisht e bashkuar siç është tani, u jep mundësi votuesve kundër BDI-së, të bashkohet rreth tyre (opozitës), të votojnë për ta, dhe ky opsion politik të korrë, pse jo edhe fitore.
KOHA: A mendoni se është e mundur gjetja e një partneri mes partive shqiptare për formimin e Qeverisë, duke e ditur se jeni të vendosur kundër ndryshimit të Kushtetutës që bllokon rrugën euroatlantike të vendit tonë. Cilat janë pritshmëritë Tuaja, kush do të lëshon pe, Ju apo partitë shqiptare?
MICKOSKI: Sërish përgjigjen time do ta ndajë në dy pjesë. Është gënjeshtër teza se me ndryshimin e Kushtetutës, Maqedonia do të bëhet anëtare e BE-së. Me ndryshimin e Kushtetutës, Maqedonia do të fillojë proces ku askush nuk garanton se do të përfundojë me sukses. Ajo që VMRO-DPMNE kërkon, ja të themi dhe të digjestojmë gjithë atë që duhet të ndodhë, hajde të shohim nëse ekzistojnë garanca se ajo është e fundit. E dyta, nëse bullgarët kërkojnë nga ne të jenë pjesë e preambulës së Kushtetutës, atëherë pse e kërkojnë këtë, a janë në pyetje të drejtat e njeriut, sepse nëse janë në pyetje të drejtat e njeriut, në Evropë ekziston një institucion referent që quhet Gjykata për të drejtat e njeriut në Strasburg. Dhe kjo Gjykatë për të drejtat e njeriut në Strasburg ka sjell 14 aktgjykime për komunitetin maqedonas në Bullgari ku konstatohet se nuk iu respektohen të drejtat e njeriut dhe zero vendime për komunitetin bullgar në Maqedoni. Hajde të shohim se çfarë do të bëjmë me këtë. Sepse, nuk mund ju të kërkoni nga ne të bëjmë edhe një lëshim, e cila sërish do të lë vragë në identitetin tonë, e nga ana tjetër – ajo që duhet ta respektoni si shtet dhe që keni ratifikuar Konventë për të drejtat e njeriut, nuk e respektoni!
Kjo neve na jep të drejtë të dyshojmë se edhe populli maqedonas ta gëlltitë këtë lëshim, më tej hy në një hapësirë shumë jokomode, në një pasiguri të madhe bashkë me bashkëqytetarët tjerë shqiptarë, turq, serbë, etj, dhe kjo neve na jep të drejtë se ne, duke bërë shumë lëshime në të kaluarën, ndryshim të emrit, ndryshim të flamurit, të bankënotave, Kushtetutën njëherë, Kushtetutën për së dyti… merituam të jemi pjesë e BE-së, por për fat të keq, asnjëherë askush nuk mbajti llogari se çfarë ka për këtë popull dhe për këto qytetarë, por çdoherë politikanët kanë parë se çfarë kanë për vete.
Kështu që ne, si politikanë në VMRO-DPMNE, çdoherë mendojmë pak më tej, hajde të shohim çfarë ka për popullin dhe për shtetin, dhe pastaj mund të ulemi dhe të bisedojmë për gjithçka. Ne jemi të përgatitur të bisedojmë për gjithçka pas zgjedhjeve me secilin. Kur jemi te kapaciteti koalicionues, do t’ju rikujtojë se sot, VMRO-DPMNE është në koalicion, nëse supozoni për partner politik shqiptarë, edhe në Komunën e Gostivarit edhe në Komunën e Tetovës. Në Komunën e Gostivarit me ASH-në e Arben Taravarit, dhe në Tetovë me Bilall Kasamin, respektivisht Lëvizjen BESA. Nëse supozoni në bllokun maqedonas, në Kumanovë jemi në koalicion me kryetarin e Lëvizjes “ZNAM”, Maksim Dimitrievski. Kështu që VMRO-DPMNE ka një potencial të gjerë për koalicion. Por pyetja më e saktë është nëse të tjerët kanë potencial për të koalicionuar me partinë më të madhe politike në Maqedoni.
KOHA: Në fillim të intervistës përmendët se do të fitoni 50-58 deputetë, ndërsa në disa takime që keni patur me qytetarët kohët e fundit, kërkoni dhe përmendni edhe 61 deputetë. Pyetjen e kam nëse po kërkoni të formoni Qeveri pa ndonjë parti shqiptare?
MICKOSKI: Shikoni, Qeveri pa shqiptarët matematikisht kjo mund të bëhet me 61 deputetë. VMRO-DPMNE dhe LSDM-në nëse bashkohen, do të kenë mbi 61 deputetë. Por, një shtet multietnik siç është Maqedonia dhe duke patur parasysh Kushtetutën ashtu siç është, patjetër duhet të ketë përfaqësim të drejtë. Dhe tani ky përfaqësim i drejtë nënkupton se ne, patjetër duhet të kemi partner shqiptar në Qeveri pa marrë parasysh nëse VMRO-DPMNE do të ketë e vetme 61 deputetë apo jo. Për shkak të përfaqësimit të drejtë, për shkak të harmonisë së marrëdhënieve interetnike të shtetit, vlerësojmë se është e patjetërsueshme që në Qeverinë e ardhshme të udhëhequr nga VMRO-DPMNE, të kemi partner shqiptar në koalicion, të kemi përfaqësim të drejtë edhe të minoritetit turk, serb, boshnjak, rom, vlleh etj. Ne duhet ta pasqyrojmë karakterin multietnik të shtetit.
Maqedonia nuk është shtet binacional. Maqedonia është multinacional, me popullatë dominante maqedonase, e dyta me etnitet më të madh janë shqiptarët, pastaj turqit, serbët, boshnjakët, romët, etj. Kur do t’i mblidhni gjithë komunitetet tjera, ju do të vini në numrin që momentalisht është 12-15 për qind. Këtë nuk mund ta injoroni. Ja shihni tani Qeverinë e BDI-së dhe LSDM-së, aty nuk keni përfaqësues të etniteteve tjera të Maqedonisë. Ajo paraqet qeveri binacionale – a keni ministër turk dhe pse nuk keni? A keni ministër serb, dhe pse nuk keni? Rom, dhe pse nuk keni? Vlleh, dhe pse nuk keni? BDI dhe LSDM ndoshta nuk besojnë në të tjerët në Maqedoni, ndërsa kërkojnë vota. Ne, për dallim nga ata, duam të kemi një situatë multietnike në të cilën të gjithë do të ndjehen rahat, jo vetëm shumica maqedonase, dhe e dyta më e madhe – shqiptare.
KOHA: Përfaqësuesit ndërkombëtarë, konkretisht amerikanët, siç ishte rasti i ndihmës-sekretari amerikan i shtetit Xhejms O’Brajan, tha, citoj: “Ai që thotë se ka ofertë më të mirë dhe nuk e tregon si është, nga ai nuk duhet të blini automobil, e lëre më ta votoni”, duke aluduar në qëndrimin tuaj për ndryshimet kushtetuese. Cili është plani juaj për ndryshimet kushtetuese dhe kur mund të ndodhin ato nëse vini në Qeveri?
MICKOSKI: E kam komentuar edhe më herët qëndrimin e z.O’Brajan, vetëm do të shtoja se në Maqedoni populli vendosë. Maqedonia është shtet sovran dhe i pavarur, qytetarët janë sovrani në këtë shtet, dhe ata vendosin për kë do të votojnë dhe në bazë të ç’kahit votojnë. Gjithsesi, ata nuk do të zgjedhin se për kë do ta japin votën e tyre për një pyetje, supozoj se ka shumë çështje të tjera që ju interesojnë dhe çështje të cilat do të jenë vendimtare për ata se kujt ato do ia japin besimin. E respektojë deklaratën, dhe e respektojë mendimin e partnerit tonë strategjik, gjithashtu pres që ata ta respektojnë mendimin e popullit të Maqedonisë, sepse ata janë sovrani që vendosë se cilët politikanë do ta udhëheqin më tej Maqedoninë. Për ndryshimet kushtetuese, e kemi thënë qëndrimin tonë, në një kontekst kam folur edhe më herët dhe do ta përsërisë edhe tani. Kështu siç është, pa patur garanca të qarta të procesit se nëse i përmbushim detyrat e shtëpisë do të jemi pjesë e familjes evropiane, pa pasur aplikacion të qartë të aktgjykimeve të Gjykatës për të drejtat e njeriut…
Shikoni, komuniteti maqedonas në Bullgari nuk kërkon të jetë në Kushtetutën bullgare, atje i ndalojnë edhe të regjistrojnë organizatë joqeveritare. Paramendoni, vend anëtar i BE-së e që e ka miratuar Konventën për mbrojtjen e të drejtave të njeriut për të gjithë qytetarët, dhe tani një grupi ju t’ia ndaloni të regjistrojë organizatë joqeveritare! E drejtë që e kanë patur, e drejtë që e kanë patur në periudhën pas Marrëveshjes së Bledit, e drejtë që e kanë patur në regjistrimin e vitit 1946, në vitin 1956 ku komuniteti maqedonas ka qenë shumicë në Bullgarinë Perëndimore, sot që quhet Maqedonia e Pirinit, pjesa e Xhumasë së Epërme, Bllagoevgrad, Sandanski, Petriç, Razlog e kështu me radhë.
Atëherë, në regjistrimet kanë numëruar nga 170-180 mijë. Ata kanë qenë 2/3 e popullatës së Bullgarisë, dhe tani përnjëherë – gjithë ato të drejta ju fshihen nga ana e regjimit komunist në Bullgari, që sot nuk munden të regjistrojnë organizatë joqeveritare, jo më shumë.
Dhe përfundimisht, Maqedonia të ndalojë, dhe populli maqedonas të humb pjesë të identitetit të saj, sepse në të kaluarën edhe ashtu kemi humbur shumë në emër të vlerave evropiane. Ne jemi shtet ku kemi shumë probleme të brendshme, ekonomi, shëndetësi, arsim, bujqësi… nuk ka sektor ku ne nuk kemi probleme dhe ne jemi të vetëdijshëm për këtë. Por në lidhje me vlerat evropiane, sidomos populli maqedonas, dhe do thosha qytetarët në Maqedoni, si asnjë popull tjetër në Evropë, përfshirë edhe vendet që ishin pjesë e paktit të Varshavës që më pas u qasën në aleancën e NATO-s dhe BE-së, në emër të atyre vlerave evropiane, populli maqedonas dhe qytetarët kanë dhënë shumë, si askush tjetër të ketë dhënë në të kaluarën. Dhe gjëja e vetme që kemi merituar është pak më shumë respekt, e kjo është ajo që këta kriminel në Qeveri e pranuan me matematikat e tyre. BDI ka patur matematikë të tyre plaçkën, ndërkohë që Kovaçevski dhe Zejqeviq përveç plaçkës – kanë patur matematikë të mbeten edhe dy vjet, pranuan gjithçka që iu vendosën në tavolinë. Ne, që atëherë paralajmëruam, kujdes se kjo nuk kalon, dhe nuk kaloi dhe nuk do të kalojë. Kështu siç është, nuk do të kalojë.
KOHA: Keni akuzuar Qeverinë se bën marrëveshje të dëmshme me Bullgarinë, nëse fitoni në zgjedhje dhe formoni Qeverinë, a mund të presim anulimin e marrëveshjes aktuale dhe se do t’i propozoni marrëveshje të re qeverisë bullgare?
MICKOSKI: Unë qëndrimin tim e kam thënë. Ajo është se jam i përgatitur që menjëherë pas formimit të Qeverisë, të ulem me njerëzit që e udhëheqin Qeverinë e Bullgarisë, me njerëzit e Sofjes zyrtare, dhe të bisedojë, sepse vlerësoj se si fqinjë – duhet të mbështetemi e jo të obstruojmë. Dhe në shpirtin e kësaj, vlerësoj se një bisedë konstruktive e bazuar në argumente, mund të na bashkojë e jo të vazhdojë të na ndajë. Sepse, edhe para Marrëveshjes për fqinjësi të mirë, ne kemi qenë fqinj dhe marrëdhëniet tona ishin shumë më të afërta krahasuar me atë pas nënshkrimit të Marrëveshjes për fqinjësi të mirë.
Tani edhe më shumë u larguam me aneksin e asaj marrëveshje, e ajo është kushtimisht thënë “propozimi francez”. Dhe tani shikoni çfarë situatë e çuditshme po ndodhë, do thosha situatë e cila nuk duhej të ndodhte – marrëveshjet në vend që të na bashkojnë, ato në mënyrë shtesë po na ndajnë. Atëherë parashtrohet pyetja: Kujt i duhen marrëveshjet? Populli është i mençur, popullit nuk i duhen marrëveshje, populli vet do të bashkohet dhe vet do të afrohet, sepse logjike është që me fqinjin tuaj të jeni më të afërt sesa me disa të tjerë. Por për fat të keq, sot situata është që dy popujt, dy shtetet, janë historikisht në marrëdhënie më të ulëta.
KOHA: A keni marrëveshje preliminare për koalicionim me ndonjë nga partitë e bllokut opozitar shqiptar, sepse ka patur akuza nga partitë në pushtet se veçmë jeni dakorduar me ASH-në e Arben Taravarit dhe se opozita shqiptare do të jetë pjesë e Qeverisë tuaj?
MICKOSKI: Unë nuk e fsheh dhe publikisht e kam thënë që opozita shqiptare dua të jetë pjesë e Qeverisë së VMRO-DPMNE-së. Këtu nuk ka asnjë dilemë. Por që kemi ndonjë marrëveshje, nuk kemi. Sepse, amerikanët kanë një deklaratë interesante që thonë “first in first”. Ejani fillimisht të mbarojmë punën e parë – detyrën e shtëpisë: të fitojmë zgjedhjet parlamentare dhe pastaj të vijmë te hapi i radhës, të bisedojmë se në çfarë ne mund të bashkëpunojmë dhe në çfarë baze do ta krijojmë koalicionin në Qeverinë e ardhshme. Por po, nuk e fsheh. E tani shikoni, nga ana e BDI-së, kjo (mbështetja) shfrytëzohet si një lloj vegle dhe thonë “shihni këta kaurët e VMRO-së bëjnë koalicion me opozitën shqiptare”. Kjo çfarë do të thotë? Do të thotë se “ne i mbrojmë të drejtat e shqiptarëve dhe ne e kemi të drejtën ekskluzive, ndërsa këta janë (opozita) tradhtarët”.
Dhe kjo vjen si porosi e cila pas 20 vitesh në pushtet lëkundej në identitet duke anuar pak nga të gjelbrit, pastaj pak ekologji e pak kriminalitet dhe kështu me radhë, që në fund të jemi dëshmitarë që, i anatemuari Aleksandar Vuçiç hapur ta mbrojë Artanin dhe Aliun nga Albin Kurti. Para disa ditëve ishte kjo deklaratë, a po!
Tani, shtohet pyetja: Kush është këtu “kauri”? Kush është tradhtari e kush nuk është tradhtar? Ne nuk i bëjmë këto ndarje. Ne vlerësojmë se BDI si opsion politik i harxhoi të gjithë mundësitë të tregojë se mund të bëj diçka dhe është mirë që të shkojë në opozitë për një periudhë të caktuar dhe të përjetojë katarzë të brendshme, si kadrovike dhe programore dhe pastaj në zgjedhjet tjera, të futet me ekip të ri, e reformuar dhe e rekonstruuar dhe ta kërkojë mbështetjen e qytetarëve. Për këtë themi që ne, nuk duam t’i ndajmë qytetarët në tradhtarë dhe patriotë. Të gjithë duhet ta duam këtë shtet, sepse është e përbashkët. Këtu kemi lindur, këtu jemi arsimuar, këtu i përjetojmë të gjitha të drejtat si qytetarë në Maqedoni. Të gjithë duhet ta duam (shtetin), nuk ka tradhtarë apo patriotë. Për ne, ndarjet mund të jenë në – program kualitativ apo jokualitativ. Kjo është ajo që neve duhet të na bashkojë dhe të konvergjojë normalisht nëse kjo do të ndodhë.
KOHA: A keni “linja të kuqe” për partitë shqiptare pa marrë parasysh se cila nga ato do të fitojë më 8 maj?
MICKOSKI: Unë e thash që, dëshira jonë është që partnerë ta kemi opozitën shqiptare. E di se kjo do të keqpërdoret nga disa megafonë pro-BDI, por po, dëshira jonë dhe e imja personalisht, që të jemi më të përpiktë, është që partner i ardhshëm qeverisës të kemi partitë që janë pjesë e opozitës shqiptare.
KOHA: A mund të na thoni kur kanë qenë kontaktet tuaja të fundit me Ali Ahmetin e BDI-së, me Arben Taravarin e ASH-së por edhe me Izet Mexhitin e Lëvizjes Demokratike?
MICKOSKI: Me Izet Mexhitin nuk kam patur kontakte. Me Arben Taravarin para se të hyjë në Qeveri, domethënë para më shumë se një viti. Ndërkohë që me Ali Ahmetin jam takuar më shpesh, e fundit ishte gjatë verës, në muajin gusht.
KOHA: A mund opinioni të pret emra shqiptarë në listat për deputetë të VMRO-DPMNE-së?
MICKOSKI: Pse jo? Nuk përjashtojë një mundësi të tillë.
KOHA: Në opinion po fliten emra si kandidat të mundshëm të VMRO-së për President. Përveç deputetes Gordana Siljanovska dhe profesorit Aleksandar Spasenovski, të cilët janë favorit në bazë të asaj që po flitet në opinion. A ka edhe emra tjerë kandidat për President, dhe kur pritet zyrtarizmi i kandidatit të VMRO-DPMNE-së?
MICKOSKI: Shikoni, VMRO-DPMNE ka publikuar thirrje publike. Thirrja publike zgjat deri më 21 shkurt, e mërkurë. Praktikisht deri atëherë do të dimë kush janë ata që i kanë plotësuar kushtet në përputhje me thirrjen publike të paraqiten në Konventën, e cila do të mbahet më 2 mars, në të cilën 500 delegatë do të votojnë se kush do të jetë kandidati i VMRO-DPMNE-së, ajo është pjesa formale. Por ka edhe një pjesë tjetër, normalisht ne si parti shtetformuese, bëjmë analiza, rejtingje e kështu me radhë. Lista është këtu diku, sillet rreth 3 emrave, të kandidatëve potencial, kështu që do të qëndrojmë rreth atij kandidati apo kandidate që do të vlerësojmë se do të ketë performanca më të mëdha të fitojë bindshëm. Njëri nga emrat është profesoresha Gordana Siljanovska, të tjerët nuk do ti zbuloja për arsye objektive. Njëri nga njerëzit që ishte pjesë e anketave është edhe profesori Aleksandar Spasenovski, ka edhe disa të tjerë, por në përgjithësi – lista sillet në tre emra që do të katalizohen pas 21 shkurtit, do të bashkohemi rreth një emri dhe ai emër do të jetë presidenti që do të fitojë edhe në rrethin e parë edhe në të dytin me një dallim të madh.
KOHA: Ju falënderojmë që ndatë kohë për të realizuar intervistën dhe ju dëshirojmë fushatë të suksesshme parazgjedhore?
MICKOSKI: Faleminderit shumë!